Pagplano sa pamilya angay sagupon

CEBU, Philippines - Nabantayan   sa  mga  tinugyanan  sa Population Commission (Popcom)  ang  kakuwang sa edukasyon  sa  mga  bag-ong  magtiayon  bahin  sa pagplano  sa pamilya   una  magminyo.

Matud  pa  ni Machael Pacios, planning officer  sa Popcom7  nga  matag  buwan  sila  ang  kontakon  sa  mga  buhatan  sa registrar  sa lungsod  ug  siyudad aron mopahigayon og  seminar  bahin  sa family  planning  sa  mga  minyoonon  o  kaslonon  na. Miingon  si Pacios nga  itudlo  gayud nila a ng  pagpakalma  sa inahan  ug  amahan  sa  pagbuhat  og  bata  samtang  kuwang pa sila  og  kinitaan  nga  ikasuporta  niini.

Matud  niya nga ipakita  nila kanunay  ang  kakuwang  sa atong  mga  puy-anan  ug  ang  kaumahan  nga  gigikanan  sa  atong  pagkaon.

Gani ilang  ipahibawo  sa mga  magtiayon  nga  ang  kagamhanan  sa nasud  tua mangompra  og  bugas  sa gawas  aron  lang  ikasuporta  sa  mga  nagtubo  nga  populasyon  sa nasud. Miingon  si Pacios  nga  karong  panahona  dili  na  sama  kaniadto  nga  gipasagdan  lang  ang  mga  magtiayon  nga  magpatuyang  sa pagpadaghan og  anak.

Kini  tungod  kay  kaniadto  abunda  pa  ang  nasud  sa mga  tanom  nga  pagkaon  og tambok  pa ang  yuta  sa natural  ug  kinaiyanhong  abuno.

Lahi  karon  nga  nagkinahanglan  ang  mag-uuma  pagdiskubre  og  mga  abuno  nga  gikan  sa  mga  sagbot  o  biya  nga   mga butang  aron  ibalik  sa pagpatambok  sa yuta.

Usa  sa gipasanginlan  sa  mga  suhito  sa panguma  nga  hinungdan  nganong  mihupas  na karon  ang  natural  nga katambok  sa yuta sa nasud  mao  ang  gipauso  nga  commercial  fertilizer, suma  ni  Pacios.

Busa  tungod  sa kakuwang  sa pagkaon  sa nasud  angay  nga  magpakabana  ang  tanan  sa pagdesiplina  sa  kaugalingon  pinaagi  sa pagplano  sa  pamilya. (BANAT NEWS)