Rama nakalapas sa balaod bahin sa calamity budget

CEBU, Philippines - Ang administrasyon ni Mayor Michael Rama wala dayon motuman sa gilatid sa balaud nga ang wala magasto nga kwarta gikan sa calamity budget angay’ng ibutang  og trust fund nga gastohon para sa mga bayranan nga may kalabotan sa katalagman. 

Usa kini sa mga isyu nga hisgutan sa mga opisyal sa Commission on Audit (COA) sa ipagawas nila nga Annual Audit Report (AAR) kabahin sa mga financial transactions sa dakbayan sa Sugbo kaniadtong miaging tuig.

Si Cebu City Auditor Cymbeline Celia Chiong Uy mipadala na og pasiuna nga suwat ngadto ni Mayor Rama nga nagpasidaan nga nakalapas sa balaud ang iyang administrasyon tungod sa kapakyas pagtuman sa lagda nga gilatid sa R.A. 10121.

Ang balaud gipirmahan ni Presidente Aquino kaniadtong 2010 atol nga si Rama napili nga mayor apan hangtud sa miaging Disyembre wala pa niya kini mapatuman.

Nabalaka ang COA nga kun ang subra nga budget magasto sa laing katuyoan apektado unya ang calamity projects sa umaabot nga katuigan.

Si City Treasurer Emma Villarete nagkanayon hinuon nga nagsugod na sila pag-transfer sa wala magasto nga kwarta sa calamity budget ngadto sa special trust funds.

Samtang matud ni Villarete nga  aduna ‘say ubang mga nagastohan na sa mga proyekto nga nasugdan na sa pagpatuman kaniadtong miaging tuig apan wala pa lang mabayri dihang ang COA naghimo sa ilang annual audit. (Rene U. Borromeo /WC)

 Suspetsadong  kawatan gipusil  angol

Kritikal ang kahimtang sa usa ka suspetsadong kawatan human kini pusila sa usa ka wala  hiilhing lalaki didto sa sitio Colis, barangay Tabunok, dakbayan sa Talisay kagahapon  sayo  sa buntag.

Ang biktima mao si Jayros Canseco Cardente alyas “Cyrus Canseco Cardente”, 29, taga barangay Tanke sa nahisgutang siyudad.

Si SPO4 Daniel Tarucan nga nahinabi sa Banat News  mibutyag nga si Cardente nakaangkon  og samad pinusilan sa tuong bahin sa iyang lawas.

Miingon  si  SPO4 Tarucan nga  ang bala milahos sa iyang buko-buko ug miigo  sa tuo niyang kamot.

Ang biktima daling gidala sa Talisay City District Hospital apan tungod sa  kalisud sa kahimtang niini gibalhin  ngadto sa Vicente Sotto Memorial Medical Center.

Sa imbestigasyon sa kapolisan nasuta nga sa wala pa mahitabo ang maong pagpamusil giingong ang biktima ug usa ka wala hiilhing lalaki naglalis  didto sa karaang merkado sa Tabunok.

Ang  lalaki  nga  nahutdan  sa katarungan  kalit nga  milanit  sa  armas  de fuego  hinungdan nga mikaratel  og  dagan ang biktima.

Apan  gigukod  kini  sa  kriminal  ug  gipusil  ang  buko-buko.

Dihang  nahagba  sa yuta  miikyas  usab  dayon  ang  kriminal  gikan sa maong  dapit.

Na-recover sa mga polis gikan sa lugar nga nahitaboan ang usa ka kabhang ug usa ka buhing bala sa kalibre .45 nga pistola.

Si Tarucan mibutyag nga si Cardente suspetsado  sa  pagpangawat sa Talisay.

Gani nadakpan kini nila kaniadto apan nakagawas human kini makapiyansa.

Si Tarucan midugang nga posibleng kaila lang sa biktima ang maong mamumuno  nga  maoy  ilang  kasamtangang  gipangita.  (BANAT NEWS)