CEBU, Philippines - Usa ka 41-anyos nga amahan ang gidakop sa kapulisan human siya gipasanginlan nga milugos sa iyang 13-anyos na anak nga babaye diha sa usa sa mga barangay sa Bantayan sa miaging Miyerkules.
Mismo ang biktima (ngan gipugngan sa Banat News) ang mipatim-aw sa Bantayan Police Station niadtong Miyerkules sa buntag ug gisumbong ang yawan-ong buhat sa iyang amahan.
Mipasangil ang bata nga gisugdan siya og lugos sa suspek sukad pa niadtong Hunyo 16 ning tuiga. Ang biktima gikuyogan sa iyang 17-anyos nga maguwang nga lalaki ug sa konsehal sa ilang barangay sa pagtaho sa kapulisan.
Base sa imbestigasyon ni PO1 Melona Lumongsod sa Bantayan Police, ang biktima mitug-an nga gisugdan siya og paglugos sa iyang amahan tungang gabii niadtong Hunyo 16. Wala maestablisar kun asa na ang ilang inahan.
Human sa pagpanglugos, matud pa nga gibaharan sa suspek ang biktima nga patyon siya ug ang iyang mga igsoon kun motug-an ni bisan kinsa sa nahitabo kanila.
Nasundan ang maong pagpanglugos hangtod nga nahimo na kini matag gabii matud pa sa biktima hinungdan nga wala na siya makaagwanta ug gitug-anan niini ang maguwang kinsa daling midala kaniya sa maong konsehal.
Ang suspek naghinol-hinol na karon sa bugnaw nga rehas sa prisohan samtang gipaabot ang kasong ipasaka kaniya.
Ang biktima gidala sa Vicente Sotto Memorial Medical Center alang sa usa ka medical examination ug psychological evaluation gumikan sa trauma nga iyang nahiaguman sa mga kamot sa iyang amahan. (Niña G. Sumacot/EIM) (BANAT NEWS)