Suspek nga kawatan napusilan angol

CEBU, Philippines - Kritikal ang kahimtang sa usa ka manguykoyay og basura nga gikatahapang kawatan   ug  napusilan  sa guwardiya nga nagbantay sa usa ka trucking company  sa dalan A.0. Perez sa barangay Subangdaku, dakbayan sa Mandaue  sa miaging tungang gabii.

Si PO2 Jessie James Galo sa kapolisan sa Presinto 2 sa Mandaue City Police Office (MCPO) nga nagbase sa barangay Subangdaku miingon nga ang biktima nga wala hiilhi  samdan  sa tuong tampihak ug milapos kini sa walang tampihak.

Dugang pa niya nga ang suspetsado nga nakapusil  mao si Richard Omandac, hingkod, ug nadistino sa Herecules Transport  sa maong dapit.

Matud pa ni PO2 Galo nga namatikdan sa suspetsado nga misulod ang biktima sa compound sa gibantayan niining establisamento   busa  iyang gipusil   gamit  ang  iyang  service  revolver  nga  .38 kalibre.

Human sa maong pagpusil,  gihatud   dayon ang biktima ngadto sa Vicente Sotto Memorial Medical Center sa dakbayan sa Sugbo.

Si PO2 Galo miingon nga walay nakaila sa maong biktima nga anaa sa kritikal nga kahimtang ug kasamtangan usab nilang gipaabot ang mga tagtungod niini.

Samtang  ang  guwardiya nga  nakapusil  sa biktima wala  usab  igkita sa  kapolisan  kay  milayas    gikan  sa iyang  gitrabahoan. (Romeo T.  Limpangog/WC) (BANAT NEWS)