Parolado nag-atubang sa kasong panglugos

CEBU, Philippines - Usa ka parolado gipasanginlang nanghilabot  sa lawas sa iyang dalagitang  humabdos   ug  nag-atubang karon  og  kaso  nga  pagpanglugos.

Nahitabo kini  niadto pang buwan sa Abril niining tuiga didto  sa barangay Cansojong, dakbayan sa Talisay.

Human sa maong hitabo ang inahan sa biktima nakigbuwag dayon sa suspetsado. Apan tungod sa kabalaka sa inahan ug anak nga  buhatan   og  dautan sa  suspetsado wala dayon sila mo -report sa mga polis.

Si PO2 Violeta Godinez sa Women and Children Protection Desk (WCPD) sa Talisay City Police Station nagkanayon  nga niadtong Miyerkules miadto sa ilang buhatan ang inahan sa biktima ug mi-report sa maong hitabo.

Apan wala niini ikuyog ang dalagita hinungdan nga ila kining gipabalik niadtong Huwebes ug gidala  na  ang biktima  dayon  gikuhaan og pamahayag sa hitabo.

Matud ni Godinez nga sa imbestigasyon ni PO1 Rechel Abellanosa, ang inahan sa biktima  kinsa manindahay  sa Tabunok  giingong kanunay’ng hasion  sa suspetsado.

Gani  gilabnihan  siya  sa   buhok   niini tungod kay nasuko kining gibuwagan. Gawas niini giingong ang suspetsado namahad pa sa inahan  nga dili niya kini hunongan.

Ang suspetsado kinsa atoa na magpuyo sa Cantabaco, dakbayan sa Toledo gipatawag sa inahan sa biktima didto  sa barangay  kapitan  sa Cantabaco,  apan giingong wala  kini moatubang.

Sa imbestigasyon usab ni Abellanosa,  nasuta nga ang nahisgutang pagpanghilabot  sa  suspetsado  ngadto  sa biktima  gihimo samtang natulog  ang  hingtungdan.

Ang dalagita   nakamata na  dihang ang iyang pribadong lawas gihikap sa suspetsado hinungdan nga iya kining giwakli.

Apan wala mopatuo ang suspetsado ug gisulod ang tudlo niini ngadto sa iyang kinatawo.

Niadtong higayona nakamata ang inahan sa biktima ug nakakita sa gibuhat sa iyang kapuyo ngadto sa iyang anak hinungdan nga nagkagubot sila ug gibuwagan  niini  ang suspetsado.

Nasayran usab sa mga polis nga ang suspetsado aduna kini kaniadto kasong pagpanglugos sa dakbayan sa Toledo ug giingong nabilanggo sulod sa tulo ka tuig apan nakagawas human kini maka-parol.

Ang suspetsado gikatakdang pasakaan og kasong pagpanglugos ug kalapasan sa Akta Republika 7610 kun “violation against women and children” tungod usab sa gibuhat niini ngadto sa inahan sa menor. (Brenda D. Batuto/WC) (BANAT NEWS)