Rama na-clear sa cash advances
CEBU, Philippines - Wala na’y tulobagon si Mayor Michael Rama ngadto sa Cebu City Accounting Department kabahin niadtong P557,000 nga kwarta nga iyang nakuha kaniadtong Disyembre kay gigasto pagpadala’g mga volunteers nga mitabang sa mga biktima sa bagyo didto sa Mindanao.
Matud ni Cebu City Accountant Diwa Cuevas nga dili gyud si Mayor Rama ang migamit sa maong kwarta apan gigamit lang ang iyang ngalan kay si Alvin Santillana sa Local Disaster Risk-Reduction Management Office (LDRRMO) dili man makakuha og cash advance. Atol sa press briefing sa City Hall kagahapon, si Santillana mitambong ug mitug-an nga nasumiter na niya ang tanang resibo ug ubang dokumento nga nagmatuod nga wala nila iwaldas ang kwarta sa kagamhanan.
Gikompirmar ni Cuevas nga wala na’y obligasyon si Rama human nga si Santillana nakasumiter sa gikinahanglang mga kwentada kun giunsa paggasto ang kapin sa tunga sa milyon ka pesos.
Daghang mga doktor, mga kawani sa City Hall ug ubang volunteers nga naglakip sa mga paramedics ang miadto sa probinsya sa Compostela Valley ug kasikbit nga dapit aron pagtabang sa mga biktima sa bagyo.
Ang kwarta nga gikuha nga cash advance sa mayor gigamit sa ilang pamasahe, pagkaon ug pagpalit sa ubang kagamitan.
Si Rama nalipay nga sa kataposan ang iyang ngalan natangtang na sa listahan sa mga adunay wala pa maresolbar nga cash advances.
Apan dunay usa sa mga administrative assistant ni Mayor Rama nga si Carlos “Charles†Reyes nga hangtud karon wala pa makahatag og kwentada sa kapin sa tulo ka milyon ka pesos nga iyang nakuha alang sa sports activities.
Gani ang sweldo ni Reyes gipugngan sukad pa kaniadtong Enero ug si Cuevas misumiter na og suwat sa Commission on Audit (COA) aron himoan na og lakang-legal si Reyes, nga maglakip sa posibleng pagpasaka kaniya og kaso. (Rene U. Borromeo/EIM) (BANAT NEWS)
- Latest
