Sikyu mikatkat sa building kay dunay mopatay niya

CEBU, Philippines - Naukay ang mga tawo sa JQS Building nga nahimutang diha sa Banilad human kalit nga nag-wild ang usa ka gwardiya tungod kay giingong adunay mopatay kaniya.

Ang nag-wild giila nga si Michael Solano,24, kinsa mikatkat sa tangke sa tubig sa second floor sa maong building ug nagbitbit og bato tungod kay duna daw mopatay kaniya.

Matud pa sa kauban sa gwardiya nga si Randy Hario nga niadtong Huwebes sa gabii gidala sa psychiatric ward sa Vicente Sotto Memorial Medical Center ang biktima tungod kay namatikdang ‘simang’ na kini kaayo kun motubag sa mga pangutana.

Apan giingong gipapauli ra kini sa doktor tungod usab kay tarong ra man kini nga mitubag sa mga pangutana.

Nakugang na lang ang mga kauban ni Solano kagahapon sa ilang pag-abot sa maong buhatan tungod kay nisuol na usab kini ug way tarong kaestorya.

Kagahapon mikatkat na ang gwardiya sa building hinungdan nga gialarma sa kapolisan ug gidakop. (Lesley Caminade-Vestil/EIM) (BANAT NEWS)