CAT officers nanulis, tulo nadakpan

CEBU, Philippines - Mga cadet officers ug ang mismong corps commander sa Citizen Army Training (CAT) sa usa sa mga pangpublikong tunghaan sa dakbayan sa Talisay gipasanginlang nanulis sa grupo sa mga bayot niadtong Lunes sa kaadlawon.

Usa sa maong mga suspetsado ang nangangakon nga menor de edad o nagpanuigon pa og 17-anyos.

Ang biktima sa pagpanulis mao sila si Eric Aneñon, Franz Joshua Nazareno ug Kevin Earl Aumentado pulos mga hingkod ang panuigon ug mga residente diha sa Tierra Del Sol Subdivision, barangay San Roque, Talisay.

Ang mga suspetsado mao sila si Warren Encabo, Junard Patilla, Hebet Paquibot, Bertran Sterling, pulos hingkod ang panuigon ug ang menor de edad.

Si SPO1 Mikie Espina mibutyag sa Banat News nga si Encabo maoy corps commander sa CAT sa tunghaan ug ang ubang mga suspetsado mga cadet officers. Ang menor gitugyan ngadto sa city social welfare.

Samtang sila si Patilla ug Paquibot padayon pang gipangita sa kapolisan.

Si Espina mibutyag nga usa sa mga suspetsado miyembro og fraternity. Giingong ang mga tanod sa barangay Tabunok nagreklamo tungod kay ang maong grupo mag-inom diha sa karsada sa lawom na ang gabii ug  magsaba-saba.

Ang mga biktima naglakaw sa lugar dihang kalit silang gibabagan ug gipangtionan og kutsilyo ug pugsanong gikuha ang bag ni Aneñon nga gisudlan sa  duha nila ka mahalong cellphone; pitaka nga may sud nga P5,000; sapatos ug jersey uniform.

Si Aneñon nakaangkon kini og mga bun-og sa lawas human giingong gikulata sa mga suspetsado. (BANAT NEWS)