Carillo namukbok?

CEBU, Philippines - Si Cebu City South District Councilor Gerardo “Gerry” Carillo gipasanginlang namukbok og bato sa ulo sa usa ka menor de edad nga lalaki atol sa nahitabong karambola gawas sa usa ka restobar sa Barangay Kamagayan niadtong Domingo sa kaadlawon.

Apan ang abogado sa konsehal nga si Atty. Noel Archival miklaro nga walay kamatuoran ang alegasyon batok kang Carillo.

Ang 16- anyos nga biktima talandugon karon ang kahimtang human mahiagom ug grabeng kadaot sa iyang ulo sa nahitabong pagpamukbok.

Ang insidente nahitabo duol sa Kuerks Restobar sa Pelaez Street, Barangay Kamagayan pasado alas 3 sa kadlawon. Ang biktima ug upat ka laing mga kaubanan giingong nakaengkwentro ang laing grupo sa mga batan-on diha sa maong dapit.

Base sa police blotter sa Pari-an Police Station, ang mga gikarambola sa grupo sa  nailhan nga sila si Zyle Jordan Saturinas, 23, Eman Cliff Fuente, ug Earl Edward Cutanda, 18, puros taga Barangay Pajac, syudad sa Lapu-lapu.

Samtang ang ilang gikaaway mao ang grupo sa biktima nga naglangkob nila ni Reynaldo Cabigas, Jorge Mainit, Archie Flores, pulos 20-anyos ug  usa ka 17-anyos ug lain pang mga John Does.

Subay sa imbestigasyon, samtang nagkarambola giingong miabot ang konsehal ug mipunit og bato dayon gibato ang ulo sa biktima.

“Siya g’yud. Gipunit niya ang bato nya iyang gibato sa ulo ni Jan,” matud pa sa duha ka kauban sa biktima.

Ang igsoon sa menor nga nalandig karon sa tambalanan nga mao si PO1 Kenneth Pogoy nga nadestino sa Parian Police Station kinsa usa sa mga mirespondi sa hitabo nagkanayon nga anaa karon sa Intensive Care Unit sa Vicente Sotto Memorial Medical Center ang iyang manghod ug niagi og surgical operation sa ulo.

Didto na niya sa ospital nahibaw-an nga ang biktima diay sa iyang girespondehan nga rambol  mao ang iyang manghod. Hunahunaon pa nila karon sa pamilya kung pasakaan og kaso  ang konsehal.

Si SPO1 Rey Cuyos sa Homicide Section, diin gi-turn over ang maong kaso, nagkanayon nga ilang kuhaan og pamahayag ang tulo ka mga saksi.

Kagahapon sa buntag, miadto si Carillo sa buhatan sa Homicide Section human siya imbitara sa kapulisan ug matud pang Cuyos gihimakak ni Carillo ang alegasyon.

Ang legal counsel usab ni Carillo nga si Noel Archival nagkanayon nga di makatarunganon nga pasanginlan ang konsehal ug paaboton nila nga ang biktima mismo maoy moila kung kinsa gyud ang nakaangol kaniya.

“Huwaton nato in the coming days nga ang biktima mismo ang mo-identify gyud. Basta rest assured, Councilor Carillo won’t abdicate his duties and responsibilities to the victim,” matud pang Archival.

 Iya usab gi-dismiss ang nanggawas nga report nga si Carillo maoy tag-iya sa maong restobar, matud niya anha lang gyud mag-estambayan ang konsehal. Si Mayor Michael Rama mimando na og lawom nga imbestigasyon sa maong hitabo ug buot  ipasusi sa City Anti Indecency Board ang maong restobar. (BANAT NEWS)