CEBU, Philippines - Pagpatik sa mga pangalan sa mga akusado ingon man niadtong uban pang direktang nalambigit sa human trafficking diha sa mga manggawas nga balita magsilbi karong dugang ngipon sa balaod aron makabantay ang publiko niini sumala pa ni Andrew Sawchenko, ang national director sa International Justice Mission (IJM).
Ang human trafficking mao ang pag-negosyo og tawo pinaagi sa pag-hire, pagdala, pagmentinar, ug uban pa nga gihimo pinaagi sa pagpamentaha sa mga mapahimuslanon bisan supak sa kabubut-on sa biktima gamit ang pwersa ug pagpanghulga o eksploytasyon sa ilang kahuyang.
Gawas sa pagpatik na sa pangalan sa mga suspek, mas bug-at na usab karon ang nagpaabot nga silot kun sila mapamatud-ang sad-an sa Expanded Anti-Human Trafficking in Persons.
Dugang ngipon
Tumong sa giamendahang balaod, mahunong na ang pagdaghan sa mga traffickers aron maalarma na ang publiko kun si kinsang mga traffickers ug mapugngan sila nga makapamiktima pag-usab.
Sa maong balaod, bisan ang mga accessory lang ug kadtong mga mitabang sa paghimo sa maong salaod duna nay nagpaabot nga bug-at nga silot inay nga community works lang sud sa pipila ka bulan.
Sa Expanded Anti-Human Trafficking Law, bisan kadtong mogamit sa mga ‘trafficked persons’ mahimo nang mapriso og unom ngadto sa dose ka tuig ug may nagtangag og dakong multa.
Si Sawchenko midugang nga walay kahadlok sa 2003 Anti-Trafficking in Person law ang mga traffickers tungod kay gaan ra kaayo ang sentensya ug posible pang mamiktima pag-usab.
Matud pa ni Sawchenko, kining mga accessories ug accomplices mao sad ang mosabotahe sa mga ebidensya ug maoy manghulga sa mga biktima ug mga testigos.
Paglaom sa pagbangon
Atol sa gihimong press conference nga kabahin sa gihimong media training nga "Reporting Human Trafficking" sa Danao City nga gipasiugdahan sa International Justice Mission (IJM) ug The Peace and Conflict Journalism Network (PECOJON), duha ka mga survivors nga nalambigit na karon sa adbokasiya kontra human trafficking ang misaysay sa ilang mga kaagi ug kung giunsa nila pagbangon ug pagpadayon sa pagpakabuhi.
Ang duha pulos nangandoy og mas haruhay nga kabutang gumikan sa ilang nasinating kakabus ug aron makatabang sa panginahanglan sa ilang banay hinungdan nga dihang dunay mitumaw nga oportunidad aron mahaw-as sa kalisod ilaha kining gidawat.
Ang usa kanila gidala ngadto sa Malaysia nga ang gisaad nga trabaho mamahimo silang singer didto apan sa beer house bar sila napunta diin gihimo silang mga entertainers.
Ang duha mitug-an nga wala sila magdahom nga ang mga tawong ilang gituohang kasaligan mao diay ang magdala kanila sa kaalaot.
Apan inay magpakahilom tibuok nilang kinabuhi mibarog sila ug nakatabang pa sa ubang posibleng mabiktima. (BANAT NEWS)