CEBU, Philippines - Gireklamo sa kabanay sa 3-anyos nga batang lalaki nga nalumos patay ang mga doktor ug nurse sa Tuburan District Hospital sa lungsod sa Tuburan tungod sa gihulagway nilang pagpabaya sa ilang katungdanan alas 4:00 sa hapon niadtong Domingo.
Ang nalumos patay mao si Chris Zan Lidris, 3- anyos, molupyo sa barangay Putat, Tuburan subay sa pamahayag sa iyang apohan nga si Nene Lidris, 44, nataligam-an ang iyang apo ug nakalabang sa karsada ug naligo sa dagat.
Mao na lay ilang nahibaw-an nga gitabang kini kay nalumos ug gidala nila sa maong tambalanan. Matud sa apohan dihang na interbyu sa Bantay Radyo buhi pa ang bata pag-abot sa tambalanan apan walay doktor nga miatiman ug ang nurse on duty maoy gikahinabi nila nipasangil kini nga gipahuwat sila sa doktor kay natulog pa kini.
Dugang pasangil ni Lidris nga nihangyo pa gani sila nga ilaha na lang i- transfer ang bata sa tambalanan dinhi sa dakbayan sa Sugbo apan nagdumili pa pagtugot ang nars kay paabuton pa nila ang doktor hangtud nga pagka alas 4:00 sa hapon namatay gyud kini.
Si Dr. Esteban Legaray ang hepe sa Tuburan District Hospital mipasabot atol sa mao gihapong sibyaanan nga dili tinuod ang pasangil nga walay doktor nga nag-duty niadtong tungura kay subay sa ilang record si Dr. Batanagol (kompletong pangalan wala makuha) ang duty adtong tungura.
Apan gibutyag ni Legaray nga subay sa ilang record alas 12:00 sa udto naabot sa tambalanan ang bata ug gipahigda dayun kini sa bed sa emergency room samtang giatiman.
Dugang niya nga gawas sa bata duna pay laing duha ka pasyente adtong tungura, ang usa nag kombulsyon ug ang usa manganakay maong magtapon tapon ang doktor sa pasyente.
Pagkahuman niini dihang naluya ang pasyente pagka alsa dos sa hapon giatiman kini sama sa pagbutang og oxygen ingon man dextrose ug gani gitambagan ang mga ginikanan sa bata nga ipa-admit ang pasyinte apan sila maoy mibalibad hangtud nga namatay kini pagka alas 4:00 sa hapon.
Si Legaray mikonpirmar nga si Chito Juluag maoy nurse on-duty niadtong tungura ug kun unsa may gibuhi-ang pamahayag niini ngadto sa kabanay sa pasyente iyaha ra kining opinyon.
Kagahapong adlawa ang ginikanan sa bata midangop sa buhatan ni Governor Hilario Junjun Davide III aron sa pagpangayo og tabang aron makabaton og hustisya sa hitabo. (BANAT NEWS)