CEBU, Philippines - Gihulagway nga putongon ug luoran ang jail guard nga mipusil patay sa iyang jail warden sa Toledo City Jail ug miangol sa babayeng clerk didto sa dakbayan sa Toledo sa miaging Biyernes sa hapon.
Si SPO4 Carmilito Hornales, desk officer sa Toledo City Police Station mibutyag sa Banat News nga mao kini sulti sa mga silingan ug kaila ni JO3 Donald Ramas, 41, nga taga barangay Cabitoonan siyudad sa Toledo.
Ang imbistigador nga si SPO3 Praxilo Albeso maoy mopasaka sa kasong murder ingon man frustrated murder batok kang JO3 Ramas ugma, Lunes.
Gipaabot usab ang resulta sa paraffin test sa suspek ingon man ang ballistic examination sa armas niini nga mosuporta sa pagpalig-on sa kasong ipasaka. Si JO3 Ramas nagtingkagol na karun sa karsel sa Toledo City Police Station human kini boluntaryong mitahan sa iyang kaugalingon niadtong Biyernes sa ala 1:45 sa hapon.
Kini human mapusil patay si jail warden Insp. Anacleto Dusaran. Si Insp. Dusaran dead on arrival (DOA) sa Toledo City District Hospital samtang si JO1 Ma. Melamid Abella kritikal pa ang kahimtang sud sa intensive Care Unit (ICU) sa South General hospital sa siyudad sa Naga.
Si jail warden Dusaran nakaangkon og samad pinusilan sa ulo ug sa iyang duha ka paa.
Nasuta sa imbistigasyon nga nasuko si JO3 Ramas kay gibalibaran siya sa biktima nga moduso og leave aron unta mag-schooling. (BANAT NEWS)