Kapolisan milarot og 100 kapin ka marijuana

CEBU, Philippines - Kapin sa usa ka gatus ka  punoan sa marijuana ang nalarot sa kapolisan gikan sa usa ka plantasyon nga ilang nadiskobrihan didto sa bukirang bahin sa Sityo Liki barangay Langub sa lungsod sa Asturias niadtong Huwebes sa alas 5:30 sa hapon.

Hinuon natumbok sa  kapolisan ang responsabli sa pagpananum   niini   nga usa ka Antonio Claru alyas Tony, hingkod, usa ka mag-uuma nga nagpuyo ra  usab sa maong dapit.

Si PO3 Douglas Maravellas sa Asturias Police   Station mibutyag  sa Banat News  nga  sa  sayo  pa,   ang mga polis nakadawat og tawag  sa ilang informant nga nagpahibawo sa lugar nga nahimutangan sa plantasyon sa marijuana.

Dali   nga  mirespondi ang kapolisan  ug tungod kay bukid kaayo,  misayo   sila  paggikan sa buntag   apan  sa pag-abot  nila  sa maong  lugar  nakabantay ang suspek ug  milayas  dayon  kini.

Mikabat  og 111 ka mga punoan sa marijuana   ang  adunay tag-as ug adunay  gagmay pa  ang nalarot sa kapolisan ug gitanggong na karon sa ilang buhatan samtang nagpaabot sa kamandoan gikan  sa Cebu Police Provincial Office (CPPO).

Hinuon ang kapolisan  naghikay  na  karon sa  kaso nga  ilang  ipasaka batok sa mag-uuma nga maoy tag-iya sa maong plantasyon sa marijuana. (/WC) (BANAT NEWS)