CEBU, Philippines - Duha ka tawo nga suspetsadong kolektor sa illegal nga sugal nga swertres ug jai-alai ang nasikop sa kapolisan sa managkalahing takna sa lungsod sa Liloan ug dakbayan sa Mandaue kagahapon.
Si PO3 Jesson Gayo sa kapolisan sa lungsod sa Liloan miila sa ilang nadakpan nga mao si Romulo Ycot Pepito, 50 , taga sitio Pag-utlan sa barangay Tayud sa lungsod sa Consolacion.
Matud pa ni PO3 Gayo nga nadakpan sa akto si Pepito nila ni PO3 Neil Vincent Guingona ug PO2 Marlon Irog-Irog nga nagdala og mokabat sa 21 ka mga tally sheet, 25 ka mga speed computer, 13 ka mga scanner ug 25 ka mga computer.
Giila ni PO3 Gayo nga nakita niya ang kombinasyon sa mga numero nga natala sa mga tally sheet nga nasakmit nga maoy nagmatuod nga masiao sa Jai Alai nga base usab sa mga tip sheet nga ilang nasakmit.
Dugang pa ni PO3 Gayo nga padulong na pauli si Pepito sa lungsod sa Consolacion human kini mangolekta sa mga tally sheet gikan sa ilang coordinator sa barangay Poblacion sa maong lungsod sa alas 5:00 sa buntag.
Ang laing nadakpan mao si Rockylino Aswe, 53, nga taga sitio Sampaguita sa barangay Banilad, dakbayan sa Mandaue.
Si PO2 David Omambac sa Presinto 1 sa Mandaue City Police Office (MCPO) miingon nga naaktohan ang suspetsado nga nangisyu og masiao nga suwertres sa dalan M.C. Briones sa barangay Guizo nga maoy hinungdan nga ilang gidakop.
Si PO2 Omambac miingon nga ilang nasakmit gikan sa maong dinakpan ang tally sheet nga may kombinasyon sa tulo ka numero nga naglakip ang double ug triple nga natala niini.
Nagtingkagol na sa prisohan ang duha ka dinakpan samtang giandam na ang kaso nga ipasaka batok kanila. (/WC) (BANAT NEWS)