Pneumonia mas daghan og napatay itandi sa Dengue

CEBU, Philippines - Gibutyag ni Cebu City health officer Stella Ygoña nga ang kaso sa pneumonia dinhi sa dakbayan maisip nga mas grabe pa kun itandi sa problema sa dengue apan wala kaayo kini mapublikar.

Matud ni Ygoña nga 98 g’yud ka kinabuhi ang nakalas sa miaging tuig human matakboyi og pneumonia nga mas daghan kini kun itandi sa 69 lang nga namatay sa natakboyan og susama nga sakit sa tuig 2011.

Gihulagway nga bisan og 69 lang ang namatay sa pneumonia kaniadtong 2011 apan mas grabe ang sitwasyon niini kay atol sa mao nga tuig miabot og 3,702 ang mga gidala sa ospital tungod sa pneumonia. Si Ygoña nagkanayon nga usa sa mga paagi paglikay nga dili matakboyan ang usa ka tawo og pneumonia mao ang dili pag-adto sa mga dapit nga daghang tawo ang magpunsisok.

Sagad sa mga dapit nga midagsang ang pneumonia mao kadtong mga siot kaayo nga barangay nga ania mahimutang sa urban area sa dakbayan sa Sugbo.

Gawas sa pneumonia, duna sa’y kapin sa 25,000 ka tawo sagad mga bata ang nakasinati og ordinaryo nga ubo-ubo, hilanat ug gipangsip-on.

Laing sakit nga nakaproblema sa City Health department mao ang pagsaka sa kalibanga kon diahrrea diin 4,871 ka pasyente ang natakboyan sa miaging tuig apan 52 gyud kanila ang namatay. (Rene U. Borromeo/EIM) (BANAT NEWS)