Walo ka polis sa CCPO nga napositibo sa illegal drugs gisilotan na sa RAB

CEBU, Philippines - Walo ka mga pulis sa Cebu City Police Office kinsa giingong nagpositibo sa ginadiling drugas nasilutan na sa Regional Appellate Board (RAB).

Pito sa maong mga pulis ang gitangtang na sa serbisyo human gipasakaan og grave misconduct samtang laing usa ang nag-atubang karon og kasong dishonesty.

Ang pito giila nga sila si PO1 Rico Caballero, PO1 Kristopper James Talam, PO1 Bob Maglasang, ug PO1 Gary Aying kinsa gipasakaan  og kasong grave misconduct ug gitangtang na sa serbisyo adtong Abril 12.

Sila si PO2 Elyzer Zafico ug PO1 Mohammad Bungkalot nag-atubang usab sa samang kaso apan wala pa masuta kung miapelar ba ang duha sa RAB.

Si PO1 Gregorio Bercero sad-an usab sa kasong grave misconduct apan miapelar pa kini sa RAB7 adtong Pebrero 22.

Apan sa walo, si PO1 Gregg Abasolo giingong gipasakaan lang og kasong dishonesty human masuta wala kini mupositibo sa drugas sa gipahigayon nga confirmatory test.

Si Abasolo misumitir kini og tubig sa dihang gipahigayon ang drug testing adtong Mayo sa miaging tuig. Gipangayuan kini og laing ihi ug nasuta nga positibo kini apan sa gipahigayon nga confirmatory test, negatibo ang resulta.

Ang random drug testing gimando ni kanhi CCPO director, Sr. Supt. Melvin Ramon Buenafe adtong Mayo 2 sa miaging tuig.

Si Regional Police Community Relations Directorate (RPCRD)-7 chief, Sr. Supt. Audie Villacin mibutyag nga ang nahitabo sa walo ka mga pulis magsilbing warning ngadto sa ubang pulis sa Central Visayas nga nalambigit sa ginadiling drugas.

“We just want the public to know that the process of administrative case filed against erring cops naa gyud nay result,” matud niya.

Si Chief Supt. Marcelo Garbo Jr., PRO-7 director, sa iyang bahin mibutyag nga kini nagpakita nga sila seryoso sa ilang kampanya batok sa ilegal nga drugas. (Ria Mae Booc/EIM) (BANAT NEWS)