CTU student nagmotor nadasmagan kritikal

CEBU, Philippines - Kritikal ang kahimtang sa usa ka marine student sa Cebu Technological University (CTU) human dasmagi    sa Toyota Hi Ace ang   motorsiklo nga iyang gimaneho sa pagawas sa highway didto sa Poblacion sa lungsod sa Carmen sayo  sa buntag niadtong  Domingo.

Ang biktima mao si Yancy Formentaro, 18, ulitawo, nagpuyo sa maong lugar ug college student sa kursong Marine sa CTU.

Ang nakadasmag sa motorsiklo nga gisakyan sa biktima mao ang Toyota Hi Ace kansang  ngalan  sa  drayber  wala makuha  tungod kay midagan pahilayo  sa maong  lugar  ug  gibilin  lang  ang  iyang  sakyanan.

Si  Radilyn Mesa,  hingkod,  nga  taga Purok Limonseto, dakbayan  sa Lapulapu  mao  nay  mi-claim  sa sakyanan  nga  nakadasmag.

Si PO1 Everett Capuyan sa Carmen Police Station  mibutyag  sa Banat News  nga  ang motorsiklo nga gimaneho sa biktima gikan   sa barangay road ug paggawas niini sa inter-section nataymingan  usab  nga  maoy  paglabay  sa Toyota Hi  Ace  busa  nadasmagan kini samtang  nagdagan  ug maayong pagkalamba  sa  karsada  ug  ang  nagsakay  nasalibay  usab.

Tungod  sa kakalit  ug  kabun-og  sa biktima  nakuyapan  kini   ug nagkadugo nga gihatud  sa Danao City District Hospital.

Tungod  sa katalandugon  sa kahimtang  girekomendar dayun   sa pagpa-transfer sa tambalanan  sa dakbayan sa Sugbo.

Ang tag-iya sa sakyanan mao nay mipatin-aw sa lugar  aron pag-claim sa iyang sakyanan ug gipangita pa   sa kapolisan   ang misibat niyang  drayber. (BANAT NEWS)