Z Package Benefit sa PhilHealth naglakip og 6 ka dagkong sakit

CEBU, Philippines - Nadugangan og  duha ka  bug-at  nga  sakit ang “Z Benefit Package”  program  sa Philippine  Health Insurance  Corp.

Mao  kini  ang  gibutyag  kagahapon  ni  Atty. Karisma Agraviador, hepe  sa public affairs unit  sa PhilHealth7 atol  sa tulomanon nga AGIO Forum  nga  gipahigayon  didto  sa buhatan  sa  Philippine  Information Agency (PIA). Matud  pa  ni  Agraviador  nga  ang  duha  ka  bug-at  nga  sakit  mao  ang  cervical  cancer  ug  cabbage coronary disease.

Ang Z Benefit  Package  may  upat  ka  orihinal  nga  bug-at nga  sakit  nga  mao  ang  breast  cancer, kidney transplant, prostate ug  acute pneumonia.

Miingon  si Agraviador  nga  kining  maong  mga  sakit  gigahinan  nila  og  igong  kantidad  nga  sarang  makaayo  gayud sa membro  nila  nga  mokalipikar  sa  maong  programa.

Gani  gisubli  ni Agraviadior  nga  sa breast, P100,000  ang  gahin  niini  sa PhilHealth,     kidney transplant, P600,000; prostate , P100,000; acute pneumonia,P175,000; cervical  cancer,P120,000 ug  ang cabbage coronary disease, P150,000.

Ang maong  programa  gitumong  alang  sa  mga  kabus  nga  membro  sa PhilHealth.

Miingon  si  Agraviador  nga   ang  Vicente Sotto Memorial Medical Center   ray  tambalanan  dinhi  sa   Sugbo  ang  napili   sa PhilHealth  nga  gihatagan  og  katungod niini  nga  mo-screen  sa pasyente.

Ang  PhilHealth  maoy  moabaga  sa tanang  gasto  sa pasyente  hangtud  nga  kini  mamaayo  gikan  sa iyang  bug-at  nga  sakit. (BANAT NEWS)