Nagselos miluba angol sa uyab

CEBU, Philippines - Tungod sa selos nalandig sa tambalanan ang usa ka head organizer sa usa ka grupo human kini dunggaba  sa iyang hinigugma   sa sitio Lawis Alaska,  barangay  Mambaling  ning  dakbayan  sa Sugbo pasado alas 6:00   kagahapon sa buntag.

Ang biktima nailhan nga si Natividad Arao-Arao, 33, molupyo sa maong lugar ug usa ka head organizer sa Righteous Movement of Government (RMG), samtang ang gitumbok nga suspetsado mao ang iyang hinigugma nga si Wenefredo Avenir Maipot Sr., 66, nga usa ka company driver.

Sa pasiunang imbestigasyon sa kapolisan nasayran nga ang biktima natulog sulod sa ilang lawak dihang sa walay daghang pangutana kalit lang  kining  gidunggab  sa suspetsado.

Bisan  og  samaran, nakadagan pa   ang  biktima  ug daling  nangayo og hinabang  sa iyang igsuon nga si Glenn   kinsa  maoy  dali   nga  mihatod   kaniya  ngadto sa Cebu City Medical Center.

Sa pakighinabi sa Banat News ni SPO3 Rey Cuyos, mipadayag kini nga aduna silay nadawat nga taho nga ang suspetsado nagselos sa higalang lalaki sa biktima nga posibling maoy nakaaghat niini nga manunggab.

Matud pa ni Cuyos nga padayon pa sila karon nga nangita sa suspetsado   kinsa  miikyas human sa maong insidenti. (BANAT NEWS)