Imbistigasyon bahin sa sex-for-fly scandal humanon na

CEBU, Philippines - Gitinguha sa Department of Labor and Employment (DOLE) nga humanon sa sunod buwan ang ilang imbestigasyon kalabot sa “sex-for-fly” scandal nga naglambigit sa mga opisyal sa  embahada ug pamuo didto sa Middle East.

Matud pa ni fact-finding investigation lawyer Leah Fortuna, nga gikoptan na nila ang pamahayag sa tulo ka Pinay overseas workers nga giingong biktima sa sexual abuse sa usa ka assistant labor attaché nga nagbase sa Riyadh.

Si Atty. Fortuna nagkanayon nga nakatakda silang moadto sa Middle East  aron manguha pa og dugang testimoniya ug ebidensiya kalabot sa kaso.

Gilauman nilang makabalik sila sa nasud sa Hulyo 13.

Giseguro usab sa maong opisyal nga makakuha sila og konkretong resulta sa ilang imbestigasyon sa maong petsa.

Kalabot niini, giingong gi-andam na sa duha ka overseas Filipino workers (OFWs) ang kasong sexual harassment nga ipasaka kang Philippine assistant labor attaché Antonio Villafuerte.

Positibong giila sa duha ka Pinay workers si Villafuerte nga giingong nang-abuso kanila samtang didto pa sila sa OFW shelters sa Saudi Arabia.

Matud pa usab ni kanhi Labor Usec. Susan Ople, pursigido ang mga biktima nga ipadayon ang kaso batok sa opisyal aron masiguro nga dili na kini makapamiktima pa og ubang OFWs. WC (BANAT NEWS)

 

Show comments