Gidunggab sa silingan angol

CEBU, Philippines - Nabuslot ang dughan sa usa ka lalaki nga gidunggab sa iyang silingan sa New Sangi Road, barangay Pajo, dakbayan sa Lapulapu sa miaging buntag.

Si PO2 John Carlo Jocotan sa homicide section sa kapolisan sa maong dakbayan miila sa biktima nga mao si Isagani Gutiv, 54 , ug  ang nagdunggab mao si Joselito Neri, 27, minyo, ug pulos nagpuyo sa maong dapit.

Matud pa ni PO2 Jocotan nga nagbarog lang sa daplin sa karsada ang biktima samtang nakigkukabildo sa laing tulo nila ka mga silingan nga  sila si Franklin, Bert ug Norman.

Dugang pa niya nga kalit  lang  nga mitumaw ang suspek nga nagdala og kutsilyo  dayong hansak  niini  sa  dughan sa biktima, makatulo ka higayon nga maoy hinungdan sa grabe nga pagkaangol sa biktima.

Human   makadunggab ang suspetsado dali nga mipauli sa ilang  balay samtang ang biktima dali usab nga gikarga og  ambulansiya sa Emergecy Rescue Unit Foundation (ERUF) ug gidala ngadto sa Mactan Doctors Hospital.

Si PO2 Jocotan miingon nga sa follow up operation nga ilang gipahigayon ilang nadakpan ang suspetsado ug kasamtangang  nagtingkagol sa sulod sa ilang bilanggoan.

Gitataw ni PO2 Jocotan nga ang biktima ug suspetsado adunay karaang  panagdumot  nga maoy nahimong hinungdan sa maong pagpanunggab. WC (BANAT NEWS)