CEBU, Philippines - Wala makatambong si Bise Presidente Jejomar Binay sa oathtaking ni Cebu City Mayor Michael Rama kagahapon.
Nanumpa sa alas dose sa udto kagahapong adlawa si Rama nga gidumala ni Court of Appeals Associate Judge Pampeo Abarrientos.
Unang nanumpa sila si Konsehal Dave Tumulak, James Cuenco, ug Atty. Hans Abella sa south district. Nanumpa usab Bise Mayor Edgardo Labella ug si Mary Ann de los Santos nga bugtong konsehal sa Team Rama nga milusot sa north district.
Miklaro ang mayor nga wala siya nahiubos sa bise presidente bisan pa man nga wala kini makatunga sa nahisgutang kalihukan.
Nagkanayon si Rama nga duna na sila’y mga naka andam nga plano ug gisabot niya si Binay hilabi na kay maggikan pa unta kini sa Samar ug naa pa sab sa Philippine Area of Responsibility ang bagyong Gorio.
Giingong wa makatunga sa syudad si Binay tungod kay duna unta kini emergency nga biyahe sa China apan wa usab mahinayon.
Samtang si Police Chief Inspector Wildemar Tiu sa Waterfront Police station mipadayag nga miabot sa kapin 1,300 ka mga tawo ang mitambong sa oathtaking sa mayor.
Si Bise Mayor Labella sa iyang bahin, dako kaayo og pasalamat nga gipili sab siya sa katawhan hilabi na nga sikit ang ilang biya ni kanhi Bise Mayor Joy Augustus Young.
“Nanghinaut ko nga mo-kooperar kanato ang ubang mga konsehal, kay para raman sad kini sa kaayohan sa mga Sugbuanon. Nisulod kita niining butanga aron moalagad sa katawhan,†suma pa ni Labella.
Gikatakdang karong adlawa usab mohatag sa iyang inaugural address ang mayor atubangan sa konseho sa siyudad sa Sugbo. Atul sa interview sa Banat News, si Labella mipasalig g’yud nga motrabaho siya dili kay alang ra sa kaayohan sa ilang grupo kun dili para sa kalamboan sa tanang taga dakbayan sa Sugbo.
Matud ni Labella nga giisip niya nga ang iyang kaluwasan dihang nalunod ang gisakyan niyang barko paingon dinhi sa Sugbo pipila ka tuig na ang milabay gituyo gyud sa kahitas-an aron makaserbisyo pa siya sa katawhan. (BANAT NEWS)