CEBU, Philippines - Kritikal ang kahimtang sa usa ka 66-anyos nga lola human kini aksidenteng natagak sa traysikol nga iyang gisakyan didto sa highway sa barangay Banhigan sa lungsod sa Dalaguete sa niaging alas 8:15 sa buntag. Ang biktima mao si Leonora Bacala, 66, nagpuyo ra sa maong lugar. Samtang ang drayber sa traysikol mao si Jonathan Conde, 41, ug nagpuyo sa barangay Casay, Dalaguete. Ang biktima pasahero ni Conde paingon na untang mopauli apan pag-abot sa maong lugar nakabuhi sa iyang pagpanggunit ang biktima dihang nihunat pagpadagan ang drayber. Ang biktima gidala sa tambalanan sa dakbayan sa Sugbo tungod sa kadaghan sa mga naangkon niining kadaot sa lawas. Si Conde mitahan usab dayun sa kapulisan. (BANAT NEWS)