CEBU, Philippines - Mihural atubangan ni Presidente Benigno Aquino III sa Malacañang kagahapon sila si Kong. Gerald Anthony “Samsam†Gullas Jr. sa unang distrito, Kong. Benhur Salimbangon sa ikaupat nga distrito ug sa lalawigan sa Sugbo. Kini aron pagpadayag sa ilang suporta sa administrasyon ni Aquino ingon man ang pagpasubli ni Speaker Feliciano Belmonte Jr..
Si Salimbangon sakop sa National Unity Party (NUP) samtang si Gullas sa Nacionalista Party (NP). Matud pa ni Salimbangon nga duha lang sila ni Gullas nga taga Sugbo nga miapil sa paghural kagahapon human sila gidapit ni Aquino.
Nunot niini, sila si Salimbangon ug Gullas mga sakop na sa mayoriya sa Ubos Bay-Balauranan.
Niadtong Huwebes, mihural usab atubangan ni Aquino ang 82 ka mga kongresista nga kaalyado sa administrasyon nga nidaug sa niaging eleksiyon. Sa Sugbo mao sila si Kong. Rodrigo Abellanosa sa Cebu City South District; Kong. Wilfredo Caminero sa ikaduhang distrito, Kong. Raul del Mar sa Cebu City North District ug Kong. Aileen Radaza, sa bugtong distrito sa dakbayan sa Lapu-Lapu.
Ubang LP nga kongresista mao sila si Kong. Felix Joseph “Ace†Durano sa ikalimang distrito ug Kong. Gabriel Luis “Luigi†Quisumbing sa ikaunom nga distrito.
Si Durano mohural karong adlawa sa dakbayan sa Danao atubangan ni Sec. Mar Roxas sa Department of Interior and Local Government (DILG) samtang si Quisumbing nakahural na atubangan ni Belmonte pipila ka semana na ang nakalabay. (Gregg M. Rubio/EIM) (BANAT NEWS)