Dengue sa Sugbu misaka og 48 porsiyento

CEBU, Philippines - Misaka og 48 porsiyento ang gidaghanon sa mga kaso sa dengue dinhi sa Sugbu sud sa unom ka buwan ning tuiga sumala pa sa Regional Epidemiology Surveillance Unit kon RESSU-7.

Si Renan Cimafranca, ang epidemiologist sa rehiyon miingon nga gikan sa buwan sa Enero hangtud ning bulana niabot na og 6,908 ang tanang kaso sa dengue ug 21 na ang mga namatay.

Mas taas kini kun itandi sa rekord sa milabay’ng tuig sa susamang kwarter nga niabot lang og 4,690 ka mga kaso apan dunay 30 ka tawo ang namatay.

Matud ni Cimafranca wala pa hinuoy gideklarar sa rehiyon nga nabutang na sa epidemic level.

Samtang ang mga opisyal sa kabarangayan sa dakbayan sa Talisay giawhag ni Konsehal Richard Francis “Choy” Aznar nga motabang sa pagsumpo sa dengue pinaagi sa pagpanguna og pagpanglimpiyo diha sa ilang tagsa-tagsa ka lugar.

Kini nunot sa report nga ang Talisay nahimutang sa ika-upat nga dunay mga kaso sa dengue sa tibuok rehiyon.

Si Aznar kinsa maoy chairman sa komitiba sa panglawas sa konseho sa siyudad nagkanayon nga nagkinahanglan usab sila og tabang sa kabarangayan sa pagsumpo sa dengue.

Gitigom ni Aznar ang mga Barangay Health Worker (BHW)  ug giawhag sa pagtabang usab og pagpanglimpiyo ug pagpangita sa mga lugar nga posibleng pundohan sa mga lamok  aron mapuhag kini. (Darrel Carumba ug Brenda D. Batuto/EIM) (BANAT NEWS)