Itok manumpa ugmang adlawa

CEBU, Philippines - Mohural ugmang adlawa ang bag-ong napiling mayor sa lungsod sa Daanbantayan nga si Engr. Augusto “Itok” Corro atubangan ni Bogo City Mayor Celestino “Junie” Martinez Jr.

Kauban ni Corro nga mohural ang iyang mga kauban sa Liberal Party nga nidaug sa miaging eleksiyon nga sila si Bise-Mayor Gilbert Arrabis Jr. ug duha ka mga bag-ong konsehal nga sila si Chona de Leon ug Emmanuel Benatiro.

Si Martinez ang pangulo sa LP sa ikaupat nga distrito sa lalawigan sa Sugbo diin sakop ang lungsod sa Daanbantayan.

Matud pa sa sinaligan ni Corro nga si Rosanni Luche nga ilang giandaman ang mokabat 8,000 ka mga bisita nga motambong sa kalihukan nga gilangkuban sa mga opisyal sa kabarangayan, mga kawani sa munisipyo, mga magpapatigayun ug mga tawo bisan unsa nga politikanhong pundok.

Si Corro midaug na gyud sa ikatulong pagsuway niya sa pagpapili isip mayor sa Daanbantayan nga gidominar sa pamilyang Loot sud na sa 15 ka tuig.

Si Mayor Maria Luisa Loot nahimong mayor sukad niadtong 1998 hangtud 2007 ug napulihan sa iyang anak nga si Bokal Sun Shimura kinsa giatbangan apan napilde si Corro niadtong 2007. Nabalik si Loot pagka-mayor sa 2010 ug iyaha gihapong gipildi si Corro.

Apan sa miaging eleksiyon sa Mayo 13, gipilde na ni Corro si Loot og sobra sa dos mil botos.

Samtang si Martinez mohural sa katungdanan sa Domingo sa gabii atubangan ni Regional Trial Court Judge Antonio Marigomen sa Bogo Public Plaza kauban sa ubang napiling opisyal sa syudad.

Si Martinez napili sa ikatulong higayun ug anaa na sa katapusan niyang termino isip mayor sa dakbayan sa Bogo. (/EIM) (BANAT NEWS)