CCTV cam malagmit ipadayon sa administrasyon sa Talisay

CEBU, Philippines - Ang taliabot  nga administrasyon sa dakbayan sa Talisay posibleng  mopadayon  sa proyekto nga  P25 milyones  nga Close Circuit Television (CCTV) camera nga daan  na nga gilaraw sa  milabay  nga administrasyon.

Si Vice Mayor-elect Romeo Villarante mibutyag kagahapon sa mga tigbalita nga susihon nila ang kahigayonan  nga  ika-estalar  ang  maong proyekto.

Matud niya nga ang siyudad niining tuiga migahin og P25 milyones sa maong proyekto ug ang maong budget nakuhaan na sa pag-instalar sa phase I   nga  habig sa barangay Tabunok.

Sa paglingkod na unya nila sa posisyon tun-an ug ipahiluna nila ang maong proyekto kung angayan ba kining ipadayon.

Hinuon matud   pa ni Villarante nga adunay mga lugar sa siyudad nga nagkinahanglan  og CCTV ug posibleng pilion lang   kining  mga  lugara.

Ang mga lugar nga posibleng butangan og CCTV mao ang nahimutangan sa mga patigayon, crime prone area sama sa Tabunok proper ug critical area sa trapiko sama  sa eskina Blaner sa Tabunok gihapon ,ug  sa Cebu South Coastal Road.

Gawas sa pagpa-instalar sa siyudad og CCTV cam, si Bise Mayor Alan Bucao   sa  miaging  buwan mipalabang og ordinansa sa pagpataod og mga CCTV cam sa mga balay patigayon,  tumong niini mao ang pagpalig-on sa kampaniya batok sa kriminalidad.

Ubos sa maong ordinansa ang tanang business establishment nga adunay minimum capital nga P1 milyon base sa ilang record nga gisumitir ngadto sa Permit and Licensing Office  maoy  gimandoan  nga magpataod pagsiguro   og  CCTV cam sa ilang balay patigayon.

Ubos sa Section 9 sa maong ordinansa, ang dili makatuman niini sa unang higayon makadawat og pahimangno, sa ikaduhang higayon pabayaron kini og multa nga P2,500, ug P3,500 sa ikatulong higayon nga paglapas. (BANAT NEWS)