Supply sa shabu mobahar

CEBU, Philippines - Gituohan  sa kapolisan   nga  mokunhod  ang  supply  sa illegal nga drugas sa  barangay Banilad, dakbayan sa Mandaue   karong  panahona. Apan  matud  pa  ni Chief Supt. Josepino Ligan, kinsa maoy hepe  sa intelligence  group  sa Mandaue City Police  Office (MCPO)  nga  gawas  sa Banilad, dakbayan  apektado usab  niini  ang  ubang  bahin  sa lalawigan  sa Sugbo.

Miingon  si  Supt. Ligan  nga  usa  lang  ang  hinungdan  niini,  nga naggumikan  sa  pagkasikop sa dakong supplier og shabu   kinsa  gituohang  maoy labing dako  nga  supplier    sa  illegal nga drugas  sa   Mandaue.

Ang nadakpan nga gipasakaan na og kaso sa kapolisan  sa paglapas  sa  Republic Act 9165 kon Comprehensive Dangerous Drug Act of 2001 mao ang 21 anyos nga si Joembee  Mark Sensio.

Si Sensio maoy  giingon ni  Supt. Ligan nga  labing dakong  supplier  og shabu  sa  lalawigan  sa Sugbo.

Si Superintendent Ligan miingon nga ang maong suspek  nga nabalhog na sa bilanggoan  adunay kapasidad sa pagbaligya og shabu  nga nagkantidad og P55 milyones    sa matag semana.

Matud pa ni Supt. Ligan nga gigamit sa maong suspetsado  ang minor de edad nga manghod niining  lalaki nga nagpanuigon pa og 16 anyos.

Nadakpan si  Sensio nga mibaligya og shabu ngadto sa police decoy sa kapolisan human ang iyang  igsoon  nga 16 anyos  nakigsabot niini .

Ang kauban ni Sensio nga nadakpan mao usab ang international boxer Jason Mark Melligen nga naaktohan nila ni Superentindent Ligan ug mga sakop nga naghingus og shabu. Maoy  hinungdan nga gisikop kini  ug  gilakip kini  sa  pagpasaka  og  kaso  ngadto sa korte. (BANAT NEWS)