CEBU, Philippines - Pormal nga miisyu og warrant of seizure and detention ang Bureau of Customs Cebu batok sa barkong Hongkong-registered nga Chinese bulk carrier MV Ming Yuan nga nag-angkorahe sa kadagatan sa Malapascua sukad pa sa miaging buwan.
Ang maong barko giingong tataw kaayong nakalapas sa mga lagda sa Bureau of Customs sama sa wala pagpananghid sa ilang pagsulod dinhi sa Pilipinas subay sa atong balaod.
Matud pa sa BOC tungod sa gibuhat sa kapitan ug sa mga crew sa barko nabutang karon sa peligro ang “national security†sa nasud ug sa populasyon niini.
Tungod sa wala nila pagpahibalo, wala makasiguro ang BOC kung dunay mga kontrabando o illegal nga kargamentong gipayuhot ang maong barko dinhi sa Sugbu.
Ug tungod gihapon sa gihimo sa maong barko, wala makabuhat sa ilang trabaho ang Bureau of Quarantine pagsigurong walay dalang makatakod nga sakit ang mga tripulante niini.
Wala usab makahimo ang Bureau of Immigration sa ilang trabaho pag-check sa mga dokumento sa 24 ka tripulante, ug kung wala bay illegal immigrants nga sakay ang maong barko.
Ang China gihasi karon sa makamatay nga sakit nga SARS ug ang ilang mga kalanggaman ug poultry industry gitakboyan og sakit nga avian flu virus maong gihulagway nga peligro kini sa panglawas sa katawhan sa Sugbu ug ingon man sa mga hayopan niini.
Tungod niini si BOC-Cebu Collector Edward Dela Cuesta mimando sa pagsakmit sa maong barko.
Ang kapitan sa barko mibutyag sa mga sakop sa Philippine Coast Guard-Cebu Station Commander Weniel Ascuna nga gikan sila sa Taiwan ug padung sa Isabel, Leyte aron mokuha og kargamento apan tungod kay wala pa maandam ang ilang kuhaong kargamento mihapit una sila sa Malapascua gikan niadtong Mayo 19 ning tuiga. (BANAT NEWS)