Pagdagit sa 16-anyos nakompirmar

CEBU, Philippines - Duha ka mga lalaki ang gidakop sa kapolisan may kalambigitan sa na-report nga kidnapping sa usa ka 16-anyos nga tinun-an sa usa ka unibersidad dinhi sa siyudad sa Sugbu.

Ang maong dalagita mibutyag nga diha siya sa usa ka dakong mall sa Barangay West Poblacion dakbayan sa Naga niadtong Miyerkules sa hapon dihang kalit siyang gisignit sa mga lalaking luwan sa usa ka gray nga van.

Ang babaye mibutyag nga gidala siya sa maong mga lalaki sa usa ka hilit ug bukirong lugar diin siya gilugos. Mialegar usab siyang dunay duha ka laing babaye nga sakay gihapon sa van nga gitaptapan ang mga mata atol sa pagsignit kaniya.

Biyernes sa gabii, nasikop sa mga sakop sa Regional Intelligence Division ug Regional Special Operations Group ang duha ka lalaking lakip sa midagit sa dalagita nga giilang sila si Jojo Jimarangan, 19, ug Joey Dela Cruz, 19, nga pulos taga Negros Occidental.

Ang hepe sa Regional Anti- Trafficking Force, Sr. Insp. Maria Theresa Macatangay mipadayag nga sa wala pa nila masikop ang duha ka suspetsado mihimo sila og reenactment ug gisubay ang tanan nga nahitabo sa 16-anyos.

Pinaagi niini ilang nahibaw-an nga gikan sa dakbayan sa Naga gidala ang biktima sa bukirang bahin sa barangay Pung-ol Sibugay sa Cebu City.

Natiman-an pa sa biktima ang hitsura sa lugar ug payag nga gidad-an kaniya ug didto ilang naabtan ang duha ka suspek nga nagbantay og mga manok kinsa positibong gitumbok sa biktima nga kauban sa mga midagit kaniya.

Sulod sa usa ka wala mahumang panimalay, adunay nakit-ang hulagway sa usa ka lalaking positibo usab nga giila sa biktima nga maoy milugos kaniya uban sa laing lalaki.

Matud pa ni Macatangay nga base sa ilang nakuha nga impormasyon daw na-tripingan ang biktima.

Dugang upat ngadto sa lima ka mga lalaki ang gipangita sa kapolisan nga giingong kauban sa pagdagit sa dalagita.

Gipasabot ni Macatangay nga walay kidnapping for ransom nga grupo nga nag-operate dinhi sa Sugbu, ang nahitabo na-tripingan lang kini.

Gipadayag usab ni Macatangay nga wala na sa maong dapit ang giingong duha ka babaye nga nakuha usab sa midagit sa biktima dihang ilang gisikop ang duha ka suspect. Nakuha sa kapolisan gikan sa duha ang usa ka .9mm pistol nga adunay lima ka bala ug kalibre .38 nga adunay lima usab ka bala.

Samtang si Jimarangan mipadayag nga wala silay labot sa nahitabong pagdagit sa biktima kini tungod usab kay diha ra man sila sa maong dapit isip tigbantay.

Gihulagway usab ni Jimarangan nga nakakita siya nga ang higala sa iyang amo mianha sa maong dapit ug nagdala og babaye apan wala siya makabantay nga ang biktima mao ang maong babaye nga kauban sa mga polis.

Ang biktima nakaikyas lang dihang nagpasumangil kining gikalibanga ug dihang nag-inusara na sa kasilyas milayat kini sa bintana ug midagan, lakaw hangtud nga naabot siya sa South Road Property sa Talisay City diin siya gitabangan sa usa ka drayber sa traysikad nga daling mitawag sa traffic enforcer ug midala kaniya sa kapolisan. (BANAT NEWS)