Way piyansa sa mga ‘kidnappers’

CEBU, Philippines - Gipasaka na ngadto sa korte ang kasong kidnapping for ransom and carnapping batok ni Ronilo Roble, 47, nga taga Kalinaw 2, San Rafael, Talisay City. Kini human gi-waived niya ang iyang katungod sa pagtubag sa maong mga pasangil batok kaniya diha sa Talisay City Prosecutor’s Office.

Si State Prosecutor Jenelyn Forrosuelo walay gi-rekomendar nga piyansa sa kasong kidnapping for ransom  apan makapiyansa sila sa carnapping og P200,000.

Ang biktima mao si Reneboy Agraviador, 29, usa ka overseas Filipino worker nga lumulopyo sa dakbayan sa Talisay. Gi-kidnap siya niadtong Domingo sa alas 9:00 sa gabii sa crossing sa Rabaya Street, Talisay City.

Si Agraviador nakig-estorya sa iyang amigo dihang nangabot ang mga akusado nga pulos mga armado ug nideklara nga kidnapping.  Gidala si Agraviador apil na ang iyang motorsiklo.

Ang iyang amigo wala madala sa mga “kidnappers” human mikisikisi kini ug naatol nga miduol ang uyab niini ug inahan.

Gawas kang Roble, gipasakaan usab og kaso sila si kanhi SWAT member PO3 Lee Colina, duha ka wala pa mailhing mga kidnappers ug ang napatay nga si Wane Tiano.

Si Tiano, 30, nga taga dakbayan sa Talisay, namatay atol sa shootout tungod kay namusil kini sa mga sakop sa NBI atol sa entrapment operation nga miresulta sa pagkaangol sa usa nila ka sakop.

Ang pay-off unta sa ransom nga P50,000 nahitabo sa Evergreen Cemetery, SRP, Talisay City apan dihang mipaila ang NBI sa ilang kaugalingon diha na nahitabo ang pinusilay.

Si Roble kusganong mihimakak sa pasangil kay wala siya’y kalibotan sa buhaton sa mga suspek nga iyang kauban tungod kay igo ra siyang gi-hire aron mo-drive. (Mylen Manto/EIM) (BANAT NEWS)