Manager patay sa aksidente

CEBU, Philippines - Nahimong dugoon ang usa unta ka makalingaw nga company outing sa mga empleyado sa usa ka fastfood chain sa dakbayan sa Lapulapu tungod kay ang ilang branch manager nadasmag diha sa South Road Properties sa siyudad sa Sugbu kagahapon sa buntag.

Ang biktima nailhan nga si Celestino Adolfo Jr., taga barangay Canduman sa dakbayan sa Mandaue nga giingong branch manager sa McDonalds nga nahimutang sa dakbayan sa Lapu-lapu.

Sa pasiunang imbestigasyon ni PO2 Wilfredo Caperida sa Cebu City Traffic Management Group nga ang biktima giingong sakay sa iyang motorsiklo patubang sa dakbayan sa Talisay diin ipahigayon ang ilang Summer Outing sa mga empleyado.

Ang biktima giingong daw nakiglumba og laing motorsiklo apan pag-abot diha sa SRP Ludo Bridge nawad-an og kontrol sa motor ang biktima ug nabangga niini ngadto sa railing sa maong bridge.

Tungod sa kakusog sa impact, ang biktima nalagpot sa sementadong dalan ug ang ulo maoy nag-una sa pagtugpa sa railings ug nabuak hasta ang iyang helmet.

Matud pang Caperida base sa gilay-on sa lawas niini ug sa iyang motor ingon man ang skid mark sa ligid kusog gyud ang pagpadagan sa biktima.

Ang motoristang si Jimbot Quintana nga nagsunod sa biktima mibutyag nga kusog kaayo ang dagan sa biktima nga daw dunay gikalumba nga laing motorsiklo apan naapiki kini sa lugar ug nabangga sa railings.

“Naa ni siya’y gikalumba nga Mio silbi pag-overtake niya naigo siya sa railings kusog man iyang dagan unya taas kaayo ug gigikanan niya.’nya nalabay ang iyang motor pero nalabay na siya,” matud pa ni Quintana.

Ang kauban sa biktimang si Fredo de Vivar, mipadayag usab nga ang ilang manager nag-una kanila kay sila nagsakay og taxi, nahibulong na lang sila nga na-traffic og maayo sa SRP ug dihang nakaduol na sila diha pa nila nadiskubrehang ang ilang manager diay ang nag-ubo diha sa dalan nga wala nay kinabuhi.

Giimbestigar usab sa kapolisan kung aduna bay kalambigitan ang usa ka trak de karga nga giingong diha gihapon sa duol sa biktima atol sa pagkahitabo tungod kay nangangkon ang drayber nga nakadungog siyang mipaka ang iyang trak.

Ang drayber mihunong ug misusi sa luyo sa iyang trak ug iyang nakit-an didto sa unahan ang nabuwag nang motor ug ang biktima. (Lesley Caminade-Vestil/EIM) (BANAT NEWS)