CEBU, Philippines - Patay ang usa ka 67- anyos nga tigulang lalaki nga naunay sa gikutay niya nga live wire nga gitumong alang unta sa pagpakuryente sa nagbalikbalik nga mga kawatan sa iyang binuhi nga mga manok igtatari diha sa sitio Lucata, barangay Looc, dakbayan sa Lapulapu alas-6 pasado ang takna kagahapon sa buntag.
Si Senior Inspector Zenaido Pastofide Jr., hepe sa homicide section sa kapolisan sa maong dakbayan miila sa namatay nga mao si Paterno Blanquero, nagpuyo sa maong dapit. Matud pa niya sa pakighinabi sa Banat News makadaghan nang nabiktima sa mga kawatan og manok si Blanquero. Ang iyang mga manok igtatari anha gipamutang sa mga tangkal luyo sa ilang balay.
Aron dili na mabiktima pag-usab gikutayan niya kini og live wire nga iyang i-switch on ini og gabii ug pagngon pagkabuntag alang sa pagpatoktok niini.
Si Pastorfide miingon nga kagahapon sa buntag nakalimot si Blanquero sa pag-off sa kuryente sa pagsulod niini sa tangkal sa mga manok ug sa paghikap pa lang niya sa pultahan kalit kining nakurentihan ug mikirig.
Ang mga sakop sa pamilya ug mga silingan sa biktima nagdali unta sa pagtabang kaniya apan namatay gyud kini. (Romeo T. Limpangog ug Bong Soriano/EIM) (BANAT NEWS)