Magna Carta alang public social workers gituki

CEBU, Philippines - Mikapin  sa  50 ka mga social workers ug uban pang service providers nga gikan sa nagkalain-laing lungsod, syudad ug  probinsya sa Central Visayas nga gipangunahan sa Department of Social Welfare and Development (DSWD-7) ang  nagtagbo dili pa dugay didto sa Crown Regency Hotel sa siyudad sa Sugbo.

Ang bugtong  tinguha  sa maong  panagtagbo mao  ang  pagsulbad sa suliran  nga  mihamok  sa  pagpatuman  sa R.A. 9344 o ang gitawag nga Magna Carta for Public Social Workers.

Matud pa ni Jaybee Binghay, tigpamaba sa DSWD-7 nga sa miaging mga tuig, pipila lamang ka mga Local Government units (LGUs) ug usab Non-Government Organizations (NGOs) ang nakasabot gayud niining maong balaod .

Kini  kalabot  sa isyu  nga gipasaka  subay sa implementasyon niini.

Sa bahin usab ni DSWD-7 Regional Executive Director Mercedita Jabagat iyang gidasig ang mga social worker nga mopaambit sa ilang mga huna-huna ug sentimento kalabot sa mga isyu ug palisiya sa Magna Carta for Public Social Workers. Sa samang  higayon  iya usab nga giawhag ang mga nanambong nga mag-amping ug  bantayan  pag-ayo  ang  unsa may gideklarar sa maong balaod.

Samtang gidiskuti usab ni Atty. Marijoy Segui, Legal Officer sa DSWD ang kalabot sa Implementing Rules and Regulations sa R.A. 9344 ug nga iyang giklaro pag-ayo ang mga benepisyo ug katungod nga  madawat sa mga public social worker. 

Ang Magna Carta for Public Social Workers nahimong balaod niadtong Pebrero 2007 subay sa palisiya sa state nga ipausbaw ang social ug ekonomikanhong dungog sa mga public social workers  lakip na ang ilang panginabuhian ug usab kondisyon sa ilang pagpanarbaho.  Ang DSWD maoy nagsilbing nag-unang ahensya nga  nagpatuman  sa R.A. 9344. (BANAT NEWS)