Giluba angol sa ig-agaw

CEBU, Philippines - Naangol ang usa ka tawo nga  gidunggab sa iyang  ig-agaw  sa barangay Suba-Basbas, dakbayan sa Lapulapu sa miaging  hapon.

Ang biktima mao si Leo Espinosa, 41, minyo ug  ang suspetsado nga nakadunggab mao si Rene Espinosa, hingkod, minyo  ug pulos nagpuyo sa maong dapit.

Si PO2 Jerson Alparito sa homicide section sa kapolisan sa maong dakbayan nga nahinabi sa Banat News miingon  nga dugay na nga naglambigit sa problema sa ilang pamilya ang hinungdan sa ilang panagbikil.

Dugang pa niya nga taliwala sa  mao nilang panagbikil  wala na sila  magkita busa  wala  na  usab  sila  magkatinagdanay  sa usa’g-usa.

Matud pa ni PO2 Alparito  nga nag-inusara nga naglakaw ang biktima padulong sa ilang  balay ug wala lamang tuyoa nga gikahinagbo   niini  ang  suspetsado.

Si PO2  Alparito miingon  gumikan  sa pagdumot, way  igong  hinungdan nga dali kining miibot sa iyang kutsilyo ug gihansakan ang walang dughan sa biktima nga maoy hinungdan sa pagkaangol niini.

Dali nga gidala ang biktima sa Lapulapu City District Hospital, samtang  ang  suspek   kinsa  nakaikyas  dayon wala   hidakpi   sa kapolisan. Giadto  sa  mga  otoridad  ang  balay  niini  apan  wala na kini  mouli  hinungdan  nga  padayon  pa  nilang  gipangita. (BANAT NEWS)