CEBU, Philippines - Kapolisan sa dakbayan sa Talisay mopahigayon og background investigation sa mga suspetsado sa kidnap for ransom nga napusilan patay sa mga sakop sa National Bureau of Investigation niadtong Lunes.
Si Superintendent Elmer Lim, officer-in-charge sa Talisay City Police Station sa pakighinabi niini sa mga tigbalita kagahapon nagkanayon nga nagpahigayon sila og background investigation batok nila ni Wane Tiano ug Ronilo Roble, taga sitio San Rafael, barangay Tanke, dakbayan sa Talisay.
Matud ni Lim nga gituohan nilang dili mga sindikato sa “kidnap for ransom†ang mga suspetsado tungod kay base sa ilang nadawat nga report giingong mga tulisan ang grupo ni Tiano.
Nagduda silang posibleng gitulis nila ang biktima nga si Rene Agraviador apan walay gikahatag nga kwarta hinungdan nga ilaha na lang kining gidala kunohay gi-kidnap ug nangayo og kwarta ngadto sa pamilya sa biktima.
Matud usab ni Lim nga mopahigayon usab sila og imbestigasyon kabahin sa giingong nagpailang polis ngadto sa biktima.
Giingong ang biktima kunohay giaresto sa maong polis nga kauban sa mga suspetsado tungod sa kaso sa ilegal nga drugas ug aron maareglo gipalukat og P50 mil sa mga paryente.
Si Agraviador giingong gisignit sa Rabaya St. sa Talisay City niadtong Domingo sa gabii.
Si Tiaño ang namatay dihang nakigpinusilay kini sa mga ahente sa National Bureau of Investigation (NBI) samtang si Roble ang nasikop atol sa gipahigayong operasyon.
Laing giingong tulo ka mga kauban sa maong mga suspetsado ang nakaikyas ug padayon pang gipangita.
Si Lim mibutyag nga ang asawa ni Agraviador nga si Minerva mianha sa ilang buhatan mi-report kabahin sa insidente. Apan mihangyo kini sa mga polis nga mo-report usab siya ngadto sa NBI hinungdan nga gihatud kini sa kapolisan sa Talisay ngadto sa buhatan sa NBI.
Ang mga giingong kidnappers nangayo kini og P50 mil nga ransom money bugti sa kaluwasan ni Agraviador.
Ang NBI mao nay mihimo sa entrapment operation batok sa mga suspetsado diin diha sila nag-abot sa Evergreen Memorial Garden sa barangay San Roque ug nahitabo ang pinusilay dihang si Tiaño giingong mihulbot og pusil dihang ang mga ahente sa NBI nagpaila ngadto kaniya.
Giangkon ni Unified Security Group (USG) founder SPO1 Samson Dasoc nga ang namatay nga si Tiano ilang kanhi miyembro apan dili na kini aktibo sukad niaging tuig.
“Miyembro na siya sa USG kaniadto pero wala na siya ming-active sugod 2012,†si Dasoc miingon.
Ang USG founder midugang nga iyang gidawat si Wane Tiano tuig 2009 tungod kay maayo ang iyang pagkaila kaniya.
“Kana siya (Tiano), gidawat namo na siya kay maayo man iyang credentials sa bantay bayan,†matud sa USG founder.
Gipasabot usab ni Dasoc nga ang ID nga nakuha sa gidudahang kidnapper expired na tungod sa ilang polisiya nga i-renew kini sa matag tuig.
“Expired na to iyang ID kay wala na man mi kahibalo ug asa na siya.Normal ra man gud na sa among grupo nga daghan muhawa kay wala biya ni sweldo. Volunteers ra baya intawon,†si Dasoc namahayag.
Si Mayor Michael Rama, sa iyang bahin, namulong nga iya nang gipaimbestigar ni Dasoc ang kalambigitan ni Tiano sa USG ug nanawagan nga dili una husgahan ang grupo tungod kay nakatabang kini sa syudad.
“Lisud tugkaron ang mga panghitabo. Si Sammy Dasoc man ana ang tig
brief ug hashas anang gustong muapil so siya ang angay mu imbestigar. Maayo man na nga grupo,†si Rama namahayag.
Dugang niya, dili angay nga ilambigit usab siya sa illegal nga buluhaton tungod lamang kay napatik ang iyang ngalan sa ID nga nakit-an sa gikapinusilay sa mga otoridad human gikatahong nangidnap og OFW.
“I associate myself with people who want to serve. Kinsa man ang suod anang mga tawo nga reported to have been involved with crimes, drugs, smuggling?
I wish that he will not mirror himself because he might discover that the things that he is accusing me of kay naa ra diay sa mga tawo nga nagpalibot niya,†ang tubag ni Rama dihang gipangayuan sa iyang habig human gikatahong mikomento ang iyang kaatbang nga si Kongresista Tomas Osmeña nga nahilambigit ang mayor sa mga tawong may iligal nga binuhatan.
Karong adlawa gikatakdang ipasaka ang kasong kidnapping batok sa mga suspek ug giingong dunay usa ka kawani sa Cebu City hall nga apilon sa pasakaan og kaso tungod sa kalambigitan niini sa maong hitabo. (BANAT NEWS)