CEBU, Philippines - Pagbasura sa kasong gisang-at sa National Bureau of Investigation batok sa usa ka Canadian national diha sa buhatan ni City Prosecutor Mary Ann Castro gibali ni Assistant City Prosecutor Liceria Lofranco-Rabillas.
Una nang gibasura ni Castro ang kasong Child Abuse batok sa Canadian nga si Garry Wayne Kevol nga gisang-at sa miaging adlaw tungod sa rason nga way personal knowledge ang NBI nga nakighilawas ang langyaw sa 15-anyos nga gikauban niini tungod kay giaresto kini diha sa sud sa sakyanan niini sa parking lot sa Citylight Garden Tower 3 sa barangay Apas ning siyudad niadtong Hunyo 14 ning tuiga.
Sumala pa sa resolusyon ni Castro wala mosunod ang NBI sa Revised Rules on Criminal Procedure sa pag-aresto sa suspek maong gimando niya nga pabuhian kini. Hinuon ang pagbasura ni Castro sa ‘instant case’ wala magpasabot nga wala nay bili ang mga ebidensyang nakuha sa NBI tungod kay mahimong himuon ang usa ka regular preliminary investigation bahin niini.
Apan human sa gihimong review ni Rabillas, nakakita kini og basehan aron ipadayon ang kaso ug wala gipabuhian ang suspek nga si Kevol. Matud pa sa komento ni Rabillas, base sa mga nakuhang ebidensya ug mga pamahayag gikan sa mismong kinse anyos nga miangkong bag-ohay pa lang gyud silang nahuman nag-sex ug gibayran siya og P1500, nakombinsir si Rabillas nga duna gyuy personal knowledge ang NBI sa krimen.
Dugang pa niini, wala na magkinahanglan og warrant of arrest ang NBI sa pagsikop kang Kevol nianang tungora tungod kay tataw kaayong minor ang kauban niini nga dili usa ka Caucasian (puti) sama sa suspek ug dili niya ig-unsa ug labaw nang dili molupyo ang dalagita sa condominium nga gidili sa balaod. (BANAT NEWS)