CEBU, Philippines - Sobra sa 30 ka mga balay sa barangay Tongkil sa lungsod sa Minglanilla ug laing napulo sa barangay Mohon, dakbayan sa Talisay ug tulo ka classrooms sa pribadong tunghaan sa barangay Pooc, Talisay ang nangaguba human kini maagii sa alimpos kagahapon sa pasado alas 2:00 sa hapon.
Si Joselito Nacario, public information officer (PIO) sa lungsod sa Minglanilla mibutyag nga 31 ka mga balay diha sa Phase 3 sa Deca Homes Subdivision sa barangay Tongkil ang nangaguba.
Matud niya nga 27 sa maong mga balay ang nahurot gyud og lupad ang mga atop samtang ang upat partially damage lang ang mga atop.
Samtang sa Villa Felisa, silingang subdivision sa Deca Homes usa ka balay usab ang nawagtangan sa atop ug laing tulo ang partially damaged.
Sa barangay Calajo-an sa maong lungsod duha ka mga atop sa balay ang partially damaged gawas niini milupad usab ang ubang atop nga sin sa bodega sa Popular Feeds.
Matud ni Nacario nga tulo ka mga punoan sa kahoy diha sa Deca Homes ug laing tulo sa Villa Felisa ang nangalarot dihang naagian sa alimpos. Hinuon walay gikatahong naangol sa maong hitabo.
Si Nacario midugang nga ang mga sakop sa Disaster Risk Management Council sa lungsod ang mitabang og limpiyo sa mga lugar nga naapektohan.
Ang kagamhanan sa lungsod sa Minglanilla naghuwat sa assessment sa mga apektadong barangay alang sa ipaabot nilang hinabang.
Sa laing bahin, si Talisay City Councilor-elect Dory Emit nga nahinabi sa Banat News kagahapon mibutyag nga sobra sa 40 ka mga residente sa sitio Kabutoy, barangay Pooc ang nawagtangan sa kuryente human ang transformer diha sa duol sa Talisay Mine Power Creativity School usa ka pribadong tunghaan ang mibuto human maagii sa alimpos.
Matud ni Emit nga ang mga atop sa tulo ka mga classroom sa maong tunghaan ang nangalarot ug dunay punoan sa Mangga nga nagpanuigon na og sobra sa 30 ka tuig ang nalarot usab.
Samtang sa sitio Libo, barangay Mohon pito ka balay ang nalarot ug laing tulo ang partially damaged. Ang maong mga balay gama sa light materials.
Gawas niini usa ang naangol nga giilang si Letecia Labadan, mga 40-anyos, kinsa ang tuong tiil niini naigo sa yero nga atop nga milupad.
Si Neil Sanchez sa Provincial Disaster Risk Reduction Management Council miingon nga lakip sa mga gilarot mao ang mga poste sa kuryente.
Ang maong mga barangay sa Talisay ug Minglanilla pulos mga coastal barangays.
Samtang usa ka Yellei Belleza nga gikahinabi sa Banat News miingon nga anaa siya sa sulod sa ilang balay dihang naghaguros ang kusog nga hangin nga may dalang uwan.
“Nagtuo ko nga uwan lang unya dili diay nahibulong ko nga itom unya nagtuyok nga hangin ug tubig…mao na diay to,†matud niya.
Gidali dayon ni Belleza sa pag-ibot ang ilang mga appliances ug daling mihapa sa yuta.
“Ang mga atop mura ug papel naglupad sa hangin unya ang among bayabas, mansanitas ug ang tambis nangatumba na,†siya midugang.
Si Emie Collera sa iyang bahin mibutyag nga ang ilang sakyanan gidala usab sa hangin pila ka metros ang gilay-on. Mikabat ngadto sa lima ka minuto una pa nawala ang maong ipo-ipo.
Si Oscar Tabada, ang pangulo sa Philippine Atmospheric Geophysical and Astronomical Service Administration miingon nga 200 kilometros matag oras ang gikusgon sa paghuros sa alimpulos kagahapon.
Matud niya mikusog ang tuyok niini pataas tungod sa init nga hangin dihang mitugpa sa yuta ang buhawi ug nahimo na kining alimpulos.
Mipasidaan si Tabada sa publiko nga kung dunay grabeng pagdag-om ug nagpangilat kinahanglang bantayan ang panganod kung dunay mopormang imbudo.
Kung duna niini, kinahanglang mangandam ang katawhan tungod kay dunay mapormang buhawi o alimpulos sa usa ka lugar nga mugna sa panag-abot sa init ug bugnaw nga hangin. (BANAT NEWS)