CEBU, Philippines - Ang tanang 5,000 ka kawani sa kagamhanan sa dakbayan sa Sugbo ingon man ubay-ubay’ng mga tinun-an gikan sa lainlaing tunghaan magpahigayon na usab og pagpanglimpyo sa kasapaan ug kabaybayonan karong Sabado.
Matud ni Pedro Cuizon nga maoy executive director sa Coastal Management Board (CMB) nga usa sa ilang hingusgan sa pagpanglimpyo mao ang kabaybayonan sa South Road Properties (SRP) kay pwerteng daghana nga mga basura tungod sa pagsige’g uwan og baha.
Si Cuizon miingon nga wala gyud mausab ang batasan sa katawhan nga magpataka lang og labay sa ilang mga sagbot mao nga kun adunay uban mabanlas kini ngadto sa dagat ug ang uban makabara sa gagmay nga mga embornal ug maoy hinungdan sa paglunop.
Ang mga tinun-an sa lainlaing tunghaan tahasan nila nga manangtang sa mga propaganda materials sa mga kandidato nga wala pa mahurot sa pagtangtang sa lainlaing koral ug poste sa koryente.
Gani matud ni Cuizon nga apil nila nga pangtangtangon mao ang mga karatola nga gipapilit sa mga poste sa kuryente ug punoan sa mga kahoy sama sa mga nagtanyag og serbisyo “Lipat Bahay,†nagtanyag og “Loan,†ug uban pa.
Nagtoo si Cuizon nga karong Sabado makahipos na usab sila og pipila ka tonelada nga mga basura. Ang mga opisyal ug kawani sa barangay giawhag usab nga motabang sa tibuok adlaw nga pagpanglimpyo sa kasapaan.
Si Mayor Michael Rama miawhag sa katawhan nga dili magpataka og labay sa ilang mga sagbot aron nga dili mahimong hugaw ang atong dakbayan ug makamugna og daghang sakit.
Gusto ni Cuizon nga karong sunod tuig magahinan og daku-daku nga kantidad ang CMB aron ilang magamit sa lainlaing proyekto. Karong tuiga P250,000 ra ang budget nga giaprobahan sa City Council para sa CMB.( /EIM) (BANAT NEWS)