Dalaga nakuryentihan sa hayhayan patay

CEBU, Philippines - Patay nang napalgan sa landlord ang 19-anyos nga dalagang nagtrabaho sa usa ka kompanya diha sa Balamban human kini gituohang nakuryentihan sa hayhayan sud sa iyang giabangang lawak sa Sityo Upper Segra barangay Buanoy sa lungsod sa Balamban niadtong Domingo sa alas 6:00 sa gabii.

Ang biktima mao si Elharny Tango-an,19,  lumad nga taga Lutopan siyudad sa Toledo.

Matud ni PO1 Alfredo De Gracia sa Balamban Police dihang nahinabi sa Banat News ang landlord sa biktima nga si Alejandro Abellanosa maoy nakakaplag kaniya dihang iyaha kining gisusi tungod kay wala motubag sa iyang pagpanampit.

Matud pa nga gipukaw unta ni Abellanosa si Tango-an tungod kay mo-duty pa kini apan wala na kini motingog pa maong gilili ni Abellanosa ang kwarto ug didto iyang nakit-an ang dalaga nga naghayang ug natabunan og kurtina. Tungod niini dali  niyang gitawag ang barangay tanod kinsa mitawag usab sa kapolisan. Sa pagsusi sa lawas ni Tango-an nasuta nga nasunog ang liog ug mga bukton ug abaga niini.  Gituohang nakuryentihan kini sa wire sa kuryente nga gihimo niyang hayhayan sud sa lawak.

Girekomendar sa kapolisan nga ipaawtopsiya ang patay’ng lawas ni Tango-an. (BANAT NEWS)