Polis kinahanglang alerto – Lim

CEBU, Philippines - Human  mapatay   ang  usa ka polis sa dakbayan sa Sugbo si Superintendent Lim, officer-in-charge sa Talisay City Police Station nagkanayon nga ang mga polis kinahanglang alerto ug responsabli kanunay sa ilang siguridad.

Kini  human  mapatay si PO2 Gerlito Estremos pinaagi  sa pagpusil patay  samtang nag-inusarang nagpatrolya  sa dalan P. Del Rosario ug Junquera sa milabay’ng  adlaw.

Pila na  ka tuig ang nakalabay dihang si PO1 William Mangubat gipusil patay sa tulisan  ilawom sa tulay sa Mananga, sa barangay Tabunok, dakbayan sa Talisay. Si Mangubat nag-inusarang migukod kaniadto sa tulisan nga  maoy  tigtulis sa mga pasahero sa PUJ.

Si Lim nagkanayon nga ang polis angay  ug  kanunay’ng alerto ug responsabli sa kaugalingong siguridad.

Gawas niini dili usab angayang subra   kaagresibo ang usa ka polis aron malikayan ang disgrasya.

Dili  usab kini angay  nga mobiya sa iyang kauban o ka-buddy aron adunay  makatabang kaniya  kun ugaling makasugat  siya  og  engkwentro.

Si Lim nagkanayon usab  nga ang mga polis kinahanglang mohatag usab og respeto sa katungod ni bisan kinsa bisan pa sa mga nakalapas sa balaod aron wala’y pagdumot nga musangpot sa krimen.

Gawas sa mga polis ang mga traffic enforcer kinsa naa kanunay sa kadalanan kinahanglang mohatag usab  og respeto sa mga nakalapas sa trapiko.

Kinahanglang manggita-huron usab ang enforcer ug tarongon og pasabot ang violator aron malikayan ang away nga musangpot usab sa krimen. (BANAT NEWS)