Unom ka ambulansya iapud-apod sa Kapitolyo

CEBU, Philippines - Makaangkon og unom ka bag-ong ambulansiya ang lalawigan sa Sugbo sa dili pa mapupos ang pagdumala ni Bise-Gob. Agnes Magpale isip kasamtangang gobernador.

Ang hunta probinsiyal sa Sugbo mihatag na og katungod kang Magpale sa paglagda sa kontrata tali sa Nissan Cebu Distributors, Inc. alang sa pag-suplay sa unom ka yunit nga Urvan nga ambulansiya balor og P7.2 milyones. Sila si Bokal Peter John Calderon ug Wilfredo Caminero sa ikaduhang distrito sa lalawigan sa Sugbo ang nangamahan sa resolusyon sa paghatag sa maong katungod kang Magpale.

Ang Nissan maoy nakahatag sa maong presyo sa gihimong subasta nga gipahigayun sa Bids and Awards Committee sa Kapitolyo. Matud pa sa hepe sa Integrated Provincial Health Office, Dr. Cristina Giango, nga ang maong mga ambulansiya kompleto sa kahimanan sa pagbalhin og pasyente sama sa oxygen, stretchers ug ubang kagamitan.

Ang upat ka provincial hospitals sa mga dakbayan sa Carcar, Danao ug Bogo ingon man  sa lungsod sa Balamban ang makaangkon og tag usa ka yunit samtang ang Badian District Hospital makaangkon usab ug ang nahabiling usa ihatag sa lungsod sa Malabuyoc o kaha sa Oslob, sumala pa ni Giango.

Si Magpale kutob na lang karong Miyerkules, Hunyo 19, sa iyang posisyon isip kasamtangang gobernador nunot sa pagkapupos na sa unom ka buwan nga suspensiyon ni Gob. Gwendolyn Garcia.

Si Garcia gikatakda nga mobalik sa iyang buhatan alang sa nahabiling 11 ka adlaw sa iyang termino hangtud sa udto sa  Hunyo 30. Mopuli kaniya sa Kapitolyo si Hilario Davide III isip gobernador samtang si Magpale isip bag-ong napili nga bise-gobernador.  (BANAT NEWS)