Polis sa Talisay andam pagtubag sa emerhensya

CEBU, Philippines - Gawas sa pagtubag sa mga insidente sa kriminalidad ang kapolisan sa dakbayan sa Talisay andam usab kining motubag kung ugaling adunay emerhensiya nga naglambigit sa kalamidad nga iya sa kinaiyahan.

Ang mga bukirang barangay sa Talisay gideklarar  sa Department of Environment and Natural Resources (DENR) nga landslide prone area.

Niining panahon sa ting-uwan delikado na usab nga adunay mahitabong pagdahili sa yuta   ug  malagmit  laing disgrasya  na usab ang  mahitabo.

Sa  milabay’ng   mga  panahon   aduna nay mga kinabuhing nakalas ug nangaangol sa mga insidente sa pagdahili sa yuta  sa bukirang barangay  sa maong  dakbayan.

Gawas sa bukirang barangay adunay mga residente usab nga anaa magpuyo sa daplin sa kasapaan ug kabaybayonan.

Ang mga residente nga duol sa sapa delikado silang mabanlas kung motubo ang tubig sa sapa ug ang naa sa daplin sa kabaybayonan delikado kining mabanlas sa dagkung mga bawod.

Si Superintendent Elmer Lim, officer-in-charge sa Talisay City Police Station nagkanayon nga ang kapolisan kanunay kining andam sa mga emerhensiya.

 Matud niya nga atol sa mga insidente sa katalagman ang role sa kapolisan mao ang pag-implementar sa siguridad ug pagtabang sa search and rescue operation.

Kini  tungod  kay  ang kapolisan  dili  kuwang  sa kaalam,  kay  aduna  kini  mga basic training  bahin sa search and rescue operation.

Ang siyudad adunay Talisay Rescue Emergency Action Team (TREAT) nga abtik usab nga motubag sa mga emerhensiya.

Si Lim midugang nga ang TREAT adunay mga ekipong magamit sama sa ambulansiya, handheld radios ug uban pa nga gamit sa pagtubag sa emerhensiya.  (BANAT NEWS)