Yellow submarine wala mopadaga’g barko

CEBU, Philippines - Wala pa makabalik sa ilang operasyon ang Cebu Yellow Submarine (CYS) gumikan kay wala pa kini makadawat sa pormal nga order sa dakbayan sa Lapulapu nga naglibkas sa ilang cease and desist order (CDO).

Mahinumdoman nga si Lapulapu City Mayor Paz Radaza  miingon   nga temporaryong ilibkas una niini ang CDO batok sa CYS sa milabay’ng semana, apan hangtod karon wala pa makadawat ang management sa CYS sa maong mando.

Gumikan niini wala una mopadagan sa ilang  submarino  ang  kompaniya aron dili sila makalapas pag-usab sa mga  balaod  nga gipatuman  sa dakbayan sa Lapulapu.

Samtang nasuta sa Banat news nga wala pa makahandos  ang Coastal Conservation and Educational Foundation (CCEF) sa ilang final report   bahin  sa ilang   gihimong  imbestigasyon sa ilawom sa Kontiki wall sa Brgy. Maribago .

Nasuta  sa sayo  pa  ang  Kontiki wall  nahimong  kontrobersiyal  tungod  kay  naguba  ang  baga  kaayong  mga  gasang sa maong  lugar sa  operasyon  sa submarine.

Matud pa ni Mayor Radaza ang maong report sa CCEF maoy ilang basehan sa ilang rekomendasyon ug pagpanday og ordinansa alang sa mga sakyanan sa dagat nga maglawig sa kadagatan sa dakbayan sa Lapulapu.

Samtang magpaabot ang tagdumala sa Yellow submarine sa pormal nga kamanduan nga maglibkas sa maong CDO ug sa mga security guard  nga mokuyog sa ilang matag adlaw nga operasyon.  (BANAT NEWS)