Duha ka babayeng ‘carnappers’ nadakpan

CEBU, Philippines - Duha ka babaye ang gidakop human gipasanginlang mga carnapper sa mga sakop sa Mabolo Police Station sa miaging gabii sa managlahi nga lugar ug oras.

Ang mga nadakpan mao silang Maria Rosely Josol Olid, 40, taga Upper Lipata lungsod sa Minglanilla ug Gionna Marie Giolina, 36, taga Dawis, dakbayan sa Talisay.

Sa pasiunang imbestigasyon sa kapolisan sa Mabolo Police nasayran, usa ka Junnly Cabahug Nacionales, 44, taga Casuntingan, Mandaue City nga nanag-iya og rent-a-car business ang midangop sa ilang buhatan kini aron magpatabang sa iyang sakyanang Toyota Vios nga kolor light blue nga adunay plakang YJZ-470 nga wala pa mauli sa iyang mga kamot.

Matod pa sa biktima nga ang duha ka suspetsado gikatahong nagpaka-aron ingnong   mga kostumer ug ilang abangan ang sakyanan niadtong Biyernes sa hapon.

Apan gikatingala sa biktima tungod kay wala na mabalik ang iyang sakyanan, hangtod nga iyang nasayran nga giprenda diay kini ni Olid sa usa ka langyaw nga nagbase sa lungsod sa Argao.

 Ang hepe sa kapolisan sa Mabolo Police Station Chief Insp. Ryan Devaras, miingon nga ilang na-trace ang sakyanan ngadto sa usa ka American national ug usa ka lending firm. 

Si Geolina nadakpan diha sa  lungsod sa      Argao.

Gawas sa awto in Nacionales, narekober usab ang usa ka Kia Rio nga adunay plakang YGD 133 ug Honda Civic nga adunay plakang GNX 916 nga puros gipanag-iya sa usa ka Juliet Capuno, 42, tag-iya usab sa usa ka rent-a-car business sa barangay Mabolo.

Giingong niadto pang mga bulan sa Abril ug Mayo nila gipang-abangan ang mga sakyanan.  (BANAT NEWS)