14-anyos naghikog kay gikasab-an

CEBU, Philippines - Usa ka 14-anyos nga tinun-an sa 3rd year high school ang naghikog sud sa ilang balay tungod kay giingong gikasab-an sa iyang ginikanan didto sa barangay Cogon sa lungsod sa Compostela niadtong Biyernes sa alas 7:00 sa gabii.

Ang nagpakamatay mao si Ramil Adaya,14, nagpuyo sa maong lugar ug 3rd year high school sa Compostela National High School sa maong lungsod.

Matud ni SPO1 Larry Fernandez sa Compostela Police dihang nahinabi sa Banat News nakit-an na lang kini sa iyang silingan nga nagbitay nga dunay higot nga pisi ang liog diha sa kusina sa ilang balay nga wala nay panimuot.

Gisuwayan pa unta kini og tabang  ug gihatud sa Danao City District Hospital apan gideklarar nga Dead on Arrival kon DOA.

Subay sa imbestigasyon sa kapulisan ang suod niining higala nga si Jerbie Arias  nakadawat og text gikan niini nga nagkanayon nga “Bay anhi lang nya mo sa amoa kay magbuhat ko’g kalingawan diri kay naghigot nako.”

Dugang nahipos nga impormasyon sa kapulisan nga gikasab-an kini sa iyang ginikanan sa wala pa kini maghikog.  (BANAT NEWS)