CEBU, Philippines - Nahanaw ang mokabat P65,000 nga salapi sa Adelight Petron Gasoline Station sa sitio Kinalumsan, barangay Canjulao, dakbayan sa Lapulapu human kini lungkaba sa wa hiilhing mga kawatan ala 1:00 pasado ang takna sa miaging kaadlawon. Si SPO1 Elmer Canillo sa Theft and Robbery Section (TRS) sa kapolisan sa maong dakbayan nga nahinabi sa Banat News miingon nga sirado na ang maong gasoline station dihang nahitabo ang pagpanglungkab.
Dugang pa niya nga ang guwardiya nga maoy nadistino sa pagbantay nga si Eugene Lugod wala usab makamatikod sa nahitabong pagpanglungkab sa atop sa buhatan sa maong gasoline station.
Midugang siya nga hangtod na sa pagsulod sa mga kawatan ug gisakiyo ang salapi nga gisulod sa kaha niini nga wala gayud mabantayi.
Matud pa ni SPO1 Canillo nga ang kauban niya nga guwardiya nga si Rogen Mahusay nga off duty na niadtong mga orasa wala na lamang usab mopauli sa ilang balay sanglit didto man kini matulog dihang nahitabo ang pagpangawat.
Si SPO1 Canillo nagkanayon nga alas 6:00 na pasado sa buntag, nga nadiskubrehan ang maong pagpangawat dihang magsugod na unta ang mga kawani sa ilang trabaho niadtong adlawa.
Gitataw niya nga adunay CCTV camera ang maong gasoline station apan wala gihapon kini kapuslanan kay dili man maklaro ang hitsura sa kawatan nga misulod sa buhatan sa maong gasoline station nga gikawatan. (/WC) (BANAT NEWS)