6 balay ug mga classroom nasunog
CEBU, Philippines - Unom ka panimalay ug tulo ka lawak saringan sa Omapad Elementary School sa Brgy. Omapad dakbayan sa Mandaue ang naugdaw sa sunog kagahapon sa kaadlawon.
Sa pasiunang imbestigasyon ni SFO1 Cepriano Codilla sa Mandaue City Fire department nasuta nga didto magsugod ang kalayo sa panimalay ni Pepita Calsada nga giingong tungod sa gipabuntagang ceiling fan sa usa sa mga nag-abang sa ilang lawak sa second floor nga si Rodrigo Aldaya.
Tungod kay gama sa “light materials†ang mga panimalay dali kining mikatap ug mitapon sa maong eskuylahan. Tungod sa sunog, walay klase nga nahitabo kagahapon subay sa kamandoan ni Eva Parena ang principal sa maong tunghaan.
Buot una ni Parena nga mainspeksyon sa City Engineers Office kun luwas pa bang balikan ang building nga nasunogan og tulo ka classrooms.
Usa ka Jovencio Semblante ang giingong napaso atol sa hitabo ug gibanabanang mokabat sa P180,000 ang danyos niini.
Samtang duha ka stalls usab ang nasunog sa sitio Sangi sa barangay Tabunok sa siyudad sa Talisay niadtong Miyerkules sa gabii atol sa pagbunok sa ulan.
Ang naugdaw mao ang usa ka ink refilling station sa usa ka Maribel Emerita ug shoe repair shop ni Nilo Rojas nga gibanabanang midanyos og P40 mil.
Matud pa nga milatay ang tubig sa uwan subay sa wire padung sa outlet ug mimugna kini og sunog. (Bong Soriano, Romeo Limpangog ug report ni Brenda Batuto/EIM) (BANAT NEWS)
- Latest
