2 gipusil angol sa ilang kainom

CEBU, Philippines -  Naangol  ang duha  ka  lalaki  dihang giatangan  kini  ug  gipusil  sa  ilang  higala  nga   ilang gikalalis  didto sa bukirang bahin sa barangay Tuyokan sa lungsod sa Aloguinsan kagahapon sa alas 8:45 sa buntag.

Ang mga biktima mao sila si Marvin Ponseca, 22,   ug Rodel Compassion, 25, minyo, ug PUJ drayber, pulos  taga  barangay Taloot, lungsod  sa Barili.  Ang suspek mao ra usab ang ilang amigo nga si Eden Ombay, hingkod, buwag na sa asawa ug nagpuyo usab sa maong lugar.

Si Sr/Insp. George Macapobre, hepe sa Aloguinsan Police   Station  mibutyag  sa  Banat News  nga  ang mga biktima ug suspek nag- inom pa  og tuba  sa  usa  ka tindahan  sa barangay, apan  nagkalalis   ug  nanghagad  na  og  sinumbagay  ang  suspek.

Aron paglikay sa kasamok, nanglakaw  ang  mga  biktima  subay  sa dalan  paingon na unta sa ilang pinuy-anan. Apan  wala  nila hibantayi  nga  ang  suspek  nag-atang  diay  kanila  nga  nagbitbit  og  .45  nga pistola.

Pag-agi  sa  mga  biktima  gipamusil  kini  ug  si Ponseca  giingong  nasabak  sa lawas, samtang  si Compassion  samdan  usab  sa abaga  ug  bukton. Human   sa maong  pagpamusil,  dali kaayong  milayas  ang  suspek , samtang  ang  mga biktima gidali paghatud  ngadto  sa Barili District Hospital apan gi-transfer sa tambalanan  sa dakbayan sa Sugbo kay seryoso  ang ilang  kahimtang.  (BANAT NEWS)