CEBU, Philippines - Nabuak ang ulo sa usa ka ginang samtang pito ang naangol nga naglakip sa usa ka lalaki nga nagsakay sa iyang motor human nabangga sa railing tunga sa karsada una malimbuwad ang trak de karga didto sa highway sa Poblacion Ward-3 sa lungsod sa Minglanilla, kagahapon sa alas 3:15 sa kaadlawon.
Ang bugtong namatay kansang ulo nabuak mao si Lorenza Canoy, 51, nga taga barangay Dugoan, Sibonga.
Ang delivery truck nga kargahanan og mga utanon adunay plaka nga GXA-714 nga gemaniho ni Joel Cardoza Ephan, 41, minyo, ug molupyo sa barangay Bae sa lungsod sa Sibonga nga nagpaingon na sa Sibonga gikan sa Carbon, dakbayan sa Sugbo.
Samtang ang ubang na-angol mao ang iyang truckboy nga anaa usab sa kritikal nga kahimtang sa tambalanan dinhi sa dakbayan sa Sugbo nga si Narciso Ortiza, hingkod, minyo, ug taga Bae, Sibonga, Aurelia Rojo, 43, minyo, taga Dugu-an,Sibonga, Rorena Amamangpang, 40, taga Papan, Sibonga, Melissa Tores, 20, dalaga, taga Bae, Sibonga, Mark Espanol,25, taga Langub, Argao, Rizalina Gonzaga, 26, taga Montpeller, Argao ug ang nagsakay og motor nga napagan mao si Rodel Lascona taga Upper Calajoan, Minglanilla.
Si PO2 Vincent Alinabo sa Minglanilla Police Station mibutyag sa Banat News nga ang maong trak de karga gikan sa Carbon, sa dakbayan sa Sugbo nga nagdeliber og mga utanon.
Apan kagahapon sa kaadlawon sakay ang mga pasahero gibutyag niini nga gituohan nilang nakatagpilaw ang drayber samtang nagmaniho sa sakyanan ug pag-abot nila sa maong lugar kalit lang mipaingon sa tunga ang sakyanan ug deretsong nibangga sa railing sa center island.
Tungod sa kakusog sa impact, nalimbuwad ang sakyanan ug nadat-ugan ang biktima nga si Canoy kansang ulo maayong pagkabuak kay napiit sa bangko.
Samtang ang ubang mga pasahero ug ang nagsakay og motorsiklo nga si Lascona nga kasugat, naigo kini sa nalagpot nga railings ug naangol usab.
Gidali pagdala ang tanang naangol sa Minglanilla District Hospital apan gideklarar nga patay na si Canoy kay nabuak ang ulo apan ang truck boy nga si Ortiz gilahos sa VicenteSotto Memorial Medical Center (VSMMC) dinhi sa dakbayan sa Sugbo kay delikado ang kahimtang.
Samtang ang drayber human sa hitabo nagdali kini nga misakay sa miagi nga bus pasaheroan ug gibiyaan ang mga biktima nga pasahero.
Mitahan sa iyang kaugalingon sa kapolisan sa lungsod sa Sibonga ug ang mga polis sa maong lungsod mao nay mipahibawo sa kapolisan sa Minglanilla.
Gikuha usab dayon kini sa kapolisan sa Minglanilla ug kasamtangang gibalhug sa ilang prisohan samtang gihikay ang tukmang sumbong nga ipasaka batok niya. (BANAT NEWS)